Yamal-a record siam zanah Barca chak zo lo

Barcelona tan rawlthar duhawm Lamine Yamal chuan record thar a siam a, Granada lakah goal a khung - kum 16 leh ni 87 mi niin, La Liga-a goal khung thei naupang ber record a siam a, mahse, Barca a chakpui zo chuang lo.

Catalan club hian Granada lakah si hnih an phur hman. Mualneitu Granada tan hian Bryan Zaragoza chuan minute 30 hmain goal hnih a khung a, Barca a barakhaih - mahse, rawlthar Yamal hian first half hun pek belhah si phurh a sut ṭhen.

Hun tawp nan minute nga chiah a awm tawh tihah Sergi Roberto chuan si phurh sutna goal a khung. Barca tan Yamal-a goal khung tur siamsaktu Joao Felix chuan chakna goal a khung emaw a inti a, mahse, offside vangin pawmsak a ni lo thung.

Pathianni zan La Liga inkhel ngaihven hlawh dangah Atletico Madrid chuan 2-1 in Real Sociedad an hneh bawk. Atletico tana Samuel Lino-a goal hmahruai chu Sociedad hian Mikel Oyarzabal hmangin an sut.

Mahse, minute 86-naah Sociedad forward Carlos Fernandez chuan handball vangin penalty a chawi a, Antoine Griezmann chuan a club hlui lakah penalty hi chhuih lutin Atletico a chakpui.

La Liga-ah Real-in hma an hruai chhunzawm zel a, Girona, Barca leh Atletico Madrid-ten an dawt.