Myanmar refugee camp beihnaah mi 29 an thi

Myanmar hmarchhak lam, China ramri bula tualchhung buaina avanga tlanchhiate awmna camp beihnaah mi 29 an thi. Thi zingah hian naupangte pawh an tel nia sawi a ni.

Camp awmna hi Kachin Independence Organisation (KIO) te thuneihna huam chhunga awm a ni a, KIO thupuangtu chuan Thawhṭanni zana Laiza kawh daia Mong Lai Khet camp beihnaa thite hi an vaiin civil mi an nih thu a sawi.

Kachin official-te chuan sipai sorkar dodaltu, Kachin mite'n KIO hi an thlawp chhoh zel avangin nikum aṭang khan sipaite hian KIO awmna bialte chu an bei nasa hle tih an sawi. Airstrike hmangin khaw hrang hrangte chu an bei fo tih an tarlang.

Sipai civil sorkar an paihthlak tak aiawhtu atana potitician-te'n an din, National Unity Goverment (NUG) chuan camp beitute chu sipaite an ni tih a sawi a, pawikhawihna rapthlak tak an thlen a ni, a ti. Mahse sipai sorkar thupuangtu, major general Zaw Min Tun chuan camp beihnaah hian sipaite an inhnamhnawih lo niin a sawi ve thung.

Official-te chuan camp beihnaa thi zingah hian naupang 11 an tel a, mi 56 hliamin, an zinga hliam na zual mi 44-te chu damdawi inah hruai an ni tih an sawi.