Chawngfianga Middle School an chak lo

Subroto Cup International Football Tournament final-ah nimin khan Chawngfianga Middle School, Saidan, Kolasib-in champion beisei mah se, Minerva Public School lakah 1-0 in an tlawm a, nomawi an beiseina chu a thamral.

Chawngfianga Middle School hian final lut tur hian an kalkawngah goal 15 ngawt an khung a, semifinal-ah pawh West Bengal aiawh team chu 5-0 in an la sawp thei - an lama goal lut miah loin final an lut.

Mahse, final-ah hun tawp dawnah goal an chhuah a, a vanduai zawkah an ṭang ta a ni - an thlirlet apiangin an ui vawng vawng ang. Army Service Corps Centre Football Ground, Bengaluru-ah Mizo naupangten nomawi an chawi thei ta lo.

Chawngfianga Middle School hian kum 2015 khan New Delhi-ah Under-14 inelna nomawi hi an lo chawi tawh a, anni bakah hian Holy Heart School, Aizawl (2002 & 2003), Govt. Middle School, Kolasib (2013) leh Saidan Secondary School, Saidan (2019) te chu an lo champion ve tawh bawk.