Kohli hi a che ṭha dawn - Kaif

Indian cricketer langsar tak ni ṭhin Mohammad Kaif chuan vawiina inlan tur India batter Virat Kohli chungah rinna a nghah ngam thu a sawi a, vawiin chawhnu dar 2:00-a Afghanistan nen an inkhelh hunah run siam hnem turin a beisei.

Men in Blue hian an match hmasa berah Australia chu wicket rukin an hneh a, Afghanistan hian Bangladesh an ngam lo thung.

Kaif chuan, "Kohli sulhnu hi chhui rawh u. Match hmasa ber a khelh ṭhat chuan a che ṭha chhunzawm zel - a tan chuan vawiin inkhel tur hi home game a ni a, fans tam takin banner keng chungin a hming an lam dawn. Stadium-ah ni se, a hming an ziak a, tiphurtu tur a mamawh belh tawh lo," a ti.

Kohli hian Australia lakah run 85 ngawt a siam a, Kaif hian Afghanistan lakah a chet ṭhat a chhawm nun a beisei - an inkhelhna tur hmun hi Arun Jaitley Stadium a ni a, Kohli-a pianna Delhi khawpuia awm a ni. Khelmual hi batter tana khelh nawmna hmun a ni bawk a, tun World Cup-a South Africa leh Sri Lanka inkhel pawh khan belhkhawmin run 750 chuang an siam a ni.

Hetihlai hian India tan dengue vangin Shubhman Gill chu a la inlan thei dawn lo a, a awm loh hlanin Ishan Kishan chuan Rohit Sharma a rawn dinchhuahpui leh tura ngaih a ni - batter pahnih hian Australia lakah khan run an siam lo!

Hetihlai hian Thawhṭanni tlai khan New Zealand chuan run 99-in Netherlands an sawp a, Kiwis tan Will Young, Tom Latham leh Rachin Ravindra ten run 50 chuang an siam vek - New Zealand hian over 50-ah run 322 siamin wicket sarih an hloh a, Netherlands hian 46.3 over-ah run 223 siamin an out vek.