Hazard-a'n inkhelh a chawlhsan

Football player thiam leh hmuhnawm zinga mi Eden Hazard chuan nimin khan inkhelh a chawlhsan thu a puang. Chelsea winger hlui hi kum 32 mi chauh a la ni a, a kum la tam lo mah se a hun hnuhnung lamah hian hliam vangin a inkhel tam lo.

Blues tan Premier League nomawi vawi hnih a chawi hnuin kum 2019 khan Real Madrid a pan, pound maktaduai 89 man lai niin khawvel player hlawh tam zinga mi a ni phak hial a, a lakah beisei an nei sang hle.

Mahse, Spanish club a zawm hnuah hliam vangin a buai ngun êm êm a, ṭha taka khelh lai a nei ta lo a ni ber. Real Madrid tan hian La Liga match 54 chauh a khelhsak a, ram tana inkhelh pawh nikum December thla khan a lo chawlhsan tawh.

Kum 32 mi Hazarad chuan, "Mahni taksa dinhmun ngaichang chungin, chawlh hun dik hriat a ngai. Kum 16 chhungin match 700 chuang ka khel a, tunah chuan professional footballer ka nihna zinkawng chu ka titawp ta," a ti.

Hazard hian French club Lille aṭangin football zinkawng a ṭan a, Ligue 1 club tan hian match 149 khelin goal 50 a khung. Chumi hnuah Chelsea a pan - Premier League club tan hian a vanglai a hmang a ni.

Blues tan hian match 352 aṭangin goal 110 a khungsak a, league nomawi pahnih leh Eurola League title pahnih a lakpui. Europa League final-a Arsenal an hneh ṭumin goal pawimawh a khung

a ni.

Hazard chuan, "Ka inkhelh hunchhung khan coach leh manager ṭha tak tak ka hrawn bakah teammate ṭha tak tak ka nei a, anni ho nena hun hlimawm khan hmang thei kha ka lawmin ka ngai dawn hle.

"Lille, Chelsea leh Real Madrid bakah Belgian Football Association chungah inkhel ve tura min thlan avangin ka lawm. A bik takin kan chhungkua, ka ṭhiante leh thurawn min petu zawng zawng chungah pawh ka lawm.

"A tawp berah chuan ka hun tir lam aṭanga a tawp thlenga min thlawp tlattu fans chungah lawmthu ka sawi. Tunah chuan zinkawng hran ka zawh a hun ta a, khelmual pawn lamah kan inhmuh leh thuai ka beisei," a ti.

Hlawhtlinna

Lille

Ligue 1: 2010–11

Coupe de France: 2010–11

Chelsea

Premier League: 2014–15, 2016–17

FA Cup: 2017–18

League Cup: 2014–15

UEFA Europa League: 2012–13, 2018–19

Real Madrid

La Liga: 2019–20, 2021–22

Copa del Rey: 2022–23

Supercopa de Espana: 2021–22

UEFA Champions League: 2021–22

UEFA Super Cup: 2022

FIFA Club World Cup: 2022

Belgium

FIFA World Cup 2018 pathumna