England-in Bangladesh an sawp

Cricket World Cup 2023 match hmasa bera New Zealand an ngam loh hnuin England an insiamṭha nghal a, nimin khan an match hnihnaah Bangladesh chu run 137 ngawtin an sawp - England tan Dawid Malan chuan run 140 ngawt siamin 'hero' a ni a, Bangladesh tan Liton Das (76 runs) che ṭha pangngai viau mah se danglamna a thlen zo ta lo.

Himachal Pradesh Cricket Association Stadium, Dharamsala-a inkhelah Bangladesh-in ṭhumvawrah vanneihna changin, vawm hmasak an thlang a, duh an thlang sual chiang hle - England hian over 50-ah run 364 siamin wicket kua an hloh a, Malan bakah run 82 siamtu Joe Root a che ṭha a, run 52 vaw chhuakin Jonny Bairstow-a'n bul a ṭan ṭha pangngai viau bawk.

Bangladesh-in hnehna chan ngei an tum a, Liton Das a ṭang thei viau - mahse, Tanzid Hasan (1), Hossain Shanto (0), Shakib Al Hasan (1) leh Mehidy Hasan (8) ten an pui ṭha tawk lo a, Mushfiqur Rahim (51) rawn pangngai ve leh viau mah se awmzia a nei phak tawh lo.

Over 48.2-ah Bangladesh player zawng zawng an out vek a, run 227 chiah an tlin avangin England lakah an mualpho.