Quarterfinal-ah Ruud a tla

Tun season Shanghai Masters zet chu beisei loh result kan hmu nasa hle. Tunlai player hmuhnawm berte zinga mi Casper Ruud chu Fabian Marozsan hneh loin quarterfinal-ah a zinkawng a tawp leh ta.

Quarterfinal-a chak loh hrim hrim hi thil mak a ni hran lo, chutihrualin seeded pariatna Ruud hnehtu Fabian Marozsan hi world number 91 a ni a, tun ṭum tournamnet atan hian seeded player zingah pawh a tel phak lo.

Mahse, nimin inkhel inhnehtawk takah Hungarian tlangval Marozsan hi 7-6 (7/3), 3-6, 6-4 in a chak a, a match lehpekah chuan Hubert Hurkacz leh Zhang Zhizhen te inkhela chak zawk a hmachhawn leh ang.

Hripui len hnuah Sanghai Masters hi an khelh leh vawi khatna a ni a, champion lai Daniil Medvedev chu a match hmasa berah a lo tla tawh bawk. Russian tlangval hian Sebastian Korda chu 7-6 (10/8), 6-2 in a ngam lo a ni.

Player ṭha ṭhenkhat an chetsual lai hian Carlos Alcaraz erawh a la che fuh. Spanish tlangval hian vawiin hian last 16-ah Grigor Dimitrov a hmachhawn ang, world number 1 ni chunga kum tawp hmang tur chuan chet ṭhat zual a mamawh hle.

China rama inelna neih laiah hian Novak Djokovic a inlan lo. Serbian star hian US Open nomawi a chawi hnuah an ram tan Davis Cup a khel zui a, hei vang hian China Open leh Shanghai Masters te hi a khel ve lo a ni.