Argentina tan Messi inlan dawn

Lionel Messi hliam a dam tawh a, duhthusam vek erawh a la ni lo mai thei. Mahse, Argentina captain hian World Cup qualifier khel tura koh a nihna chu a chhang a, tunkar tawp hian a inlan ngei a rinawm.

Argentina tana a feh chhuak hnuhnungah khan Messi hi a inhliam. A tihrawl hliam vangin Inter Miami tan pawh a inlan thei lo, an match hnuhnungah erawh hun rei vak lo chu a inlan thei tawh thung.

La Albiceleste coach Lionel Scaloni-a'n player 34 a koh zingah erawh Messi hi a tel ta tho. Major League Soccer club Inter Miami pawhin Messi hi a zin an phalsak a, khelmual chhungah minute 90 chhung a inlan ngei dawn em, tih erawh sawi theih a la ni lo.

Kum 36 mi Messi hian nakkuma khelh tur Copa America chu hmachhawn a tum tih a sawi chiang tawh a, hetih lai hian World Cup 2026 a khelh dawn leh dawn loh erawh a la sawi chiang thei lo thung.

European football huanga sulhnu ropui leh ṭha a hnutchhiah hnuin US-ah a inkhel leh mek a ni a, a tan chuan Europe aṭanga US lama zin hahthlak bik ang kha a awm tawh rih lo, taksa hah lutuk loin ram tan a inlan thei tawh.

World champion Argentina hian World Cup qualifier match hnih an khelh tawhah hnehna an chang ve ve, world champion vawi nga ni tawh Brazil nen point ruk hmuin goal difference-ah Brazil an ṭha hret thung.

Argentina hian October 13, Zirtawpni zing dar 4:30-ah Paraguay an mikhual dawn. October 18, Nilaini zing dar 7:30-ah Peru an lenchilh zui leh nghal dawn bawk a ni.

Argentina Squad:

Goalkeepers: Emiliano Martínez (Aston Villa), Franco Armani (River Plate), Juan Musso (Atalanta).

Defenders: Walter Benítez (PSV Eindhoven), Juan Foyth (Villarreal), Gonzalo Montiel (Nottingham Forest), Nahuel Molina (Atletico Madrid), Germán Pezzella (Real Betis), Cristian Romero (Tottenham), Lucas Martínez Quarta (Fiorentina), Nicolás Otamendi (Benfica), Marco Pellegrino (AC Milan), Marcos Acuna (Sporting Lisbon), Nicolas Tagliafico (Lyon), Lucas Esquivel (Athletico Paranaense).

Midfielders: Leandro Paredes (Roma), Guido Rodríguez (Real Betis), Enzo Fernández (Chelsea), Rodrigo de Paul (Atletico Madrid), Exequiel Palacios (Bayer Leverkusen), Carlos Alcaraz (Southampton), Giovani Lo Celso (Tottenham), Alexis Mac Allister (Liverpool), Thiago Almada (Atlanta United), Bruno Zapelli (Athletico Paranaense).

Forwards: Paulo Dybala (Roma), Lionel Messi (Inter Miami), Julián Alvarez (Manchester City), Lautaro Martínez (Inter Milan), Facundo Farías (Inter Miami), Lucas Beltrán (Fiorentina), Alejandro Garnacho (Manchester United), Nico González (Fiorentina), Lucas Ocampos (Sevilla).