Euro 2028 thlengtu tur UK & Republic of Ireland

European football-a thuneitu sang ber UEFA chuan nimin khan European Championship 2028 thlengtu tur a puang a, United Kingdom leh Republic of Ireland chuan he inelna hi an thleng dawn - dil ve dang an awm lo!

UK leh Ireland ṭang dun hi a tirah chuan Turkey nen an inel a, mahse, Turkey hian Euro 2032 thleng tura Italy thawhpui an thlan tak zawk avangin an inhnukdawk a, UK & Ireland lawmah a tla ta a ni.

Ruahman dan chuan Cardiff khawpuia Principality Stadium chuan Euro 2028 hawnna hi a thleng dawn a, London khawpuia stadium hmingthang Wembley-ah final khelh tur a ni ang.

UK hnuaiah hian England, Scotland, Wales leh Northern Ireland te an awm a, an zingah hian Wales leh Northern Ireland hi major tournament la thleng ngai lo an ni a, UK thawhpui Republic of Ireland tan pawh tun hi major tournament an thlen hmasak ber tur a ni.

Euro 2028-a match te chu khelmual 10-ah thleng tura ruahmanna siam a ni a, heng zingah hian Glasgow khawpuia Hampden Park, Dublin khawpuiin a larpui êm êm Aviva Stadium, Northern Ireland lama Belfast hmuna mi Casement Park leh Everton stadium la sak zawh loh Bramley-Moore Dock te pawh an tel.

Major tournament thlengtute hian a tlangpui thuin inelnaah qualifier khelh ngai loin an tling nghal ṭhin. Mahse, UK leh Ireland-in an inthlen ṭawm dawn takah chuan ram pangain an thleng dawn tihna a ni a, pahnih aia tam chu an tling nghal sa kher lo mai thei.

UEFA hian an majoor tournament thlen diltute tana hriatturah hemi chungchang hi an ziak thlap a, "Ram pahnih inthurual aia tamin inelna chu inthlen ṭawm an dil a nih chuan an tling nghal ang, tih tiam theih a ni lo - qualifying inelna ngaihtuah chunga thutlukna siam a ni ang," an ti.

Hetihlai hian Euro 2028 thleng tur zinga ram langsar ber England chuan automatic qualification hi an beisei dawn hran lo nia sawi a ni a, Three Lions hian inelna neih hmaa friendly match hmanga inpuahchuah ai chuan qualifier hmang ngeia intahhriam an duh nia sawi a ni.