National Games kal tur mi 26 chiang tawh

India ram huap inelna 37th National Games chu October 25 aṭanga November 9 chhung hian Goa khawpuiah khelh a ni dawn a, he hunah hian Mizo infiammi pawh eng emaw zat an inlan dawn.

Mizoram Olympic Association (MOA) chuan infiammi a tir chhuak dawn a, nimin tlai thleng kha a tel thei tur chiang tawh hi mi 26 an tling. Mizoram aiawh tur hian National Senior Championship paltlanga tling chu sports discipline pariat awmin discipline ṭhenkhatah tlin belh theih a la ni bawk.

Tling tawh zingah hian taekwondo an tam ber a, player pasarih tlingin, sepaktakraw-ah player panga, boxing, snooker leh weightliftring-ah te player pathum ṭheuh, wrestling, judo leh aquatics-ah player pakhat ṭheuh an tling.

Tun hnai khan MOA chuan MFA Committee Room-ah Mizoram aiawh tur discipline hrang hrang coach leh manager te kokhawmin, inbuatsaihna kalpui dan tur an sawi ho a ni.

India rama inelna sang ber National Games hmachhawn turte hi MOA chuan a ṭha thei ang bera thuam a tum a. Coaching camp-na tur sum tum sakin a ṭha thei ang bera chhawmdawl a tum.

National Games-ah hian inelna sports discipline 48 awmin, National Games a la tel ngai lo leh Mizoin kan la hmelhriat tam loh - beach handball, roll ball, golf, snooker, martial art chi hrang hrang inelna a awm dawn bawk.

Mizoram aiawh tur chiang tawh chin

1 Taekwondo 9 + 2 (Official)

2 Sepaktakraw 5 + 2 (Official)

3 Weightlifting 3 + 2 (Official)

4 Boxing 3 + 2 (Official)

5 Billiard & Snooker 3 + 2 (Official)

6 Judo 1 + 1 (Official)

7 Wrestling 1 + 1 (Official)

8 Aquatics 1 + 1 (Official)

Total 26 + 13 (Official)