Birmingham coach turin Rooney hming an lam ri

Championship club Birmingham City chuan an coach John Eustace chu thla 15 chauh an inhrawn hman tihin an ban a, a hmun ruak luah turin Manchester United legend Wayne Rooney hming lam rik nghal a ni.

Birmingham City hian kar hmasa Ningani khan an match hnuhnung berah West Bromwich Albion chu 3-1 in an hneh a, derby-ah hnehna chang zo hlim chiah ni mah se coach Eustace-a'n a hmaa thil inchhawp a pumpelh phah lo.

Championship club hian tun season-ah league match 11 khel tawhin vawi nga hnehna an chang a, vawi thum tlawmin, vawi thum draw an nei a, table-ah parukna an ni.

Birmingham hi che chhe ta hluai anga sawi a rem lo a, mahse, Wayne Rooney a lo awl chiah bawk si nen, indinthar turin rilru thar an seng niin a lang - Rooney-a enkawl team an nih chuan ngaihven an hlawh leh sawt dawn.

Rooney a awl maw?

Pathianni zan khan Rooney chuan MLS club a enkawl mek DC United chu inhriatthiam tawnnain a chhuahsan a, English forward ropui hian a club hi playoff a thlenpui zo lo - hei hi DC a chhuahsan chhan ber niin a lang.

Kum 37 mi Rooney hian July 2022 aṭang khan Washington club hi a lo enkawl tawh a, January 2020-a Derby County a zawm hma khan DC United-ah hian thla 18 a lo khel hman tawh bawk.

Hei vang hian Rooney hi he club-ah hian a mikhual lo a, chutihrual chuan an beisei playoff a khelhpui miau loh avangin English striker ropui ṭhin tan cham chhunzawm zel hi thil nuam ber niin a lang lo.

DC United chief executive leh co-chairman ni bawk Jason Levien chuan, "Wayne nen kan sawi ho a, hetia inṭhen mai hi kan tan a ṭha tlang a ni," tiin a sawi a, Rooney hnuaia khelh chhunzawm zel an châk lo tih a lang.

A danglam lo

Rooney-a'n England-a club a enkawl hmasak ber chu Derby County a ni a, he club a enkawl lai hian sum leh paiah harsatna nasa tak an tawh avangin an talbuai hle - Eustace-a'n a enkawl laiin Birmingham pawhin he buaina tho hi an tawk.

Sum lama an talbuai avangin Birmingham hi hralh tum a ni a, mahse, vawi hnih ngawt hralh tuma indawrna chu a tlawlh. Hetihlai hian point paihsak theih dinhmunah an ding hman a, relegate thei dinhmunah an ding bawk.

Mahse, July 13 khan American sumdawng hausa Tom Wagner-a kaihhruai Shelby Companies Limited chuan Birmingham an lei fel a, club talbuai lai zawnga kaihruaitu Eustace erawh thla hnih chuang awrh hnuah ban zui a ni.

Season hmasa khan Eustace hian Birmingham hi 17-na a nihpui a, match thum khelh tur la awmah a himpui - sum lama club talbuai dan leh club inrelbawlna fuh lohzia ngaihtuah chuan football hrechiang tam zawkin Eustace hian hna a thawk ṭha thawkhatah an ngai.

Hming langsar

Shelby Companies Limited-in Birmingham an lei hnuah hian khawvel huapa infiammi langsar Tom Brady chuan Birmingham a zawm a, mahse, American football quarterback ropuiin a zawm dan erawh advisory board Chairman a ni a, club-ah share a nei bawk.

Birmingham neitute chuan khawvel huapa an club chawi lar turin hming langsar an club chhungkuaa lakluh zel an duh nia sawi a ni a, tuna England legend Rooney hming an lam ri hi thil awm lo a ni hran lo.

Rooney-a'n DC United a chhuahsan hma pawh khan Birmingham nen hian sawizawm a lo ni tawh a, United striker hlui hian Thawhṭanni khan a chhungte hmu tura England-a lo kir mai a nih thu sawiin, "October emaw November-ah emaw sawmna ka hmuh chuan kan ngaihtuah ang," a ti.

Player a nih laia Manchester United tana nomawi chawi theih zawng zawng chawitu Rooney hian Derby a lo enkawl tawh avangin Championship-ah a mikhual dawn lo. Chutihrual chuan Derby-ah khan match 85 enkawlin vawi 24 chiah a chakpui a, vawi 22 draw neiin, vawi 39 a tlawmpui - DC-ah match 53 enkawlin vawi 14 a chakpui a, vawi 25 an tlawm thung.