China Open ngaihlutu Swiatek

Iga Swiatek chuan tun hnaia China Open nomawi a chawi chu a ngaihhlut thu a sawi, season chawhnu lamah result nei ṭha tawk lo mah se Asia khawmualpuia inelna lianah a hlawhtling thei a ni.

Grand Slam a zo tawh a, tennis season tawp lam hian Asia-ah inelna a awm ṭhin. Chung zingah chuan China Open hi ngaihhlut hlawh zinga mi a ni a, world number 2 Swiatek hian Liudmila Samsonova chu 6-2, 6-2 a hnehin a champion.

Kum 22 mi Swiatek chuan, "Tun hmain he hmunah hian sulhnu ropui ka la nei ngai lo, tunah chuan ka champion ta hial. Inkhelh harsa ka tih ṭhinna hmuna hlawhtlinna chan chu ka tan pawh a hlu zual bik hle.

"Tuna ka champion-na hian inrintawkna nasa tak min siam belh ngei ang tih ka ring a, nasa lehzual zawka beiin hlawhtlinna dang pawh ka beisei zui dawn a ni," tiin a sawi a, thlen chin aṭanga hmasawn zel a tum.

Swiatek hian final kalkawngah tun hnaia khel ṭha tak mai Coco Gauff a hneh. US Open champion Gauff hi a match hnuhnung 17 chak zawn thei a ni a, tunah chuan a chak tluang record ṭha tak hi Swiatek lakah a tawp.

Kar hmasa khan mipa inelna lamah Jannik Sinner chuan Daniil Medvedev hnehin nomawi a lo chawi tawh bawk a ni.