Spain khelmualah beiseina neitu Scotland
International break a ni a, football ngainatu tam zawkin kan ngaihven club football inelna chu tun kar chhung chu a reh 'rih' dawn - mahse, international football lamah pawh inkhel hmuhnawm tak en tur a awm dawn tho a, Spain chuan zanin dar 12:15-ah Euro 2024 qualifier khel turin Scotland an mikhual ang.
Euro 2024 qualifying group draw neih a nih khan Spain chu group A roreltu tura ngaih an ni nghal a, mahse, beiseina leh a tak ram chu a inang lo. Group A-ah Scotland hi hmahruaitu an ni mek a, pahnihna Spain aiin point rukin an sang zawk!
Scotland hian match nga an khelh tawhah hnehna an chang vek a, point 15 an nei mek - an hnuai chiaha awm Spain aia an sanna hi point ruk lai a tling a, Spain tan zanina Scotland hneh hi tihmakmawh a ni.
Euro qualifier-ah hian group tin aṭangin a sang pahnih chu Euro khel turin an tling dawn. Spain hnuai chiahah hian Erling Haaland-a te ram Norway an awm a, point hnih chiaha La Roja hi an phak loh mek avangin Spain an him lo.
Scotland tan beiseina
Seville khawpuiah team pahnih an intawng dawn a, Spain tan beiseina nei zel tura chak ngei ngei a ṭul laiin Scotland erawh Spain nen an in draw ringawt a nih pawhin an tling dawn - tlawm ta pawh ni se, inkhel lehlamah Norway-in Cyprus an hneh lo a nih chuan an tling tho ang.
Hampden Park, Glasgow-ah team pahnih hi an lo intawng tawh a, Manchester United midfielder Scott McTominay chuan goal hnih khungin, Scotland hian 2-0 in hnehna an chang. Kum 1975 hnua an la chak leh lohna Spain-ah chak an tum dawn.
Chutihrual chuan Spain hian Scotland an ngam loh hnuah inelna hrang hrangah match li khel leh tawhin, an chak vek a, UEFA Nations League nomawi hial an chawi - Nations League-ah hian Italy (2-1, semifinal) leh Croatia (0-0 (5-4), penalty - final) an hneh.
Euro lamah chuan Georgia (7-1) leh Cyprus (6-0) an sawp a, March thla daih tawha Scotland an hneh loh hian an ngaihtuahna a tibuai pha lo tura ngaih a ni. Scotland tan Kieran Tierney chu hliam vangin a inlan thei dawn lo a, Andrew Robertson hoin Spain tudawl an tum ang.
Spain an talbuai
La Roja-in zaninah chak an mamawh a, mahse, an ṭhat dan berin an inlan thei dawn lo. Barcelona rawlthar ṭhangduang Lamine Yamal chu khel bawr hliam vangin a inhnuhdawh a ṭul a, Villarreal winger Yeremy Pino pawh malpui hliam vangin kan hmu dawn lo.
Spain player langsar zingah Dani Olmo (khup), Pedri (malpui), Marco Asensio (ke phah) leh Jose Gaya (malpui) te chu hliam vanga inlan thei lo tur an ni bawk a, Spain kim lo hi Scotland hneh turin an ṭha tawk em, tih chu kan hre thuai dawn.
La Roja tan tun season-a 'form' êm êm mai Alvaro Morata chu innghahna tur a ni leh dawn a, thla hmasaa ram tana koh loh, Brighton & Hove Albion forward Ansu Fati chu squad-ah koh a ni ve leh ta bawk.
Spain-in inhliam an neih nual ruain Gavi, Rodri leh Ferran Torres te ho an la kawl bawk a, an bench lam pawh a la chhah ṭha viau - zaninah an tan chak a ṭul tih hre chungin an inlan dawn a, mahni mualah mualpho vawi hnihna thlen tir an duh lo ang.