Inkhelh rei tum Harry Kane

England captain Harry Kane chuan an ram tan a rei thei ang ber inkhelh a tum tih a sawi a, kum 2028 hian an ramin European Championship a thleng dawn, chumi huna inlan theih chu a duh tih a sawi.

Tottenham striker hlui hian ram leh club tan nomawi a chawi thei lo a, hlawhtlinna chan theih beiseiin Bayern Munich a zawm. Tunah chuan Three Lions tan Euro 2024 qualifying khel turin a inbuatsaih mek thung.

Kum 30 mi Kane chuan, "Football chauh ni loin infiamna khawvelah hian, kum 30 tlin chuan hun tawp lam a hnai tawha ngaihna a lian hle. Mahse, kei chuan ka hun tawna a zatve a zo a, a chawhnu lam ka ṭan dawn chauh niah ka ngai zawk.

"Cristiano Ronaldo, Lionel Messi, Robert Lewandowski leh Zlatan Ibrahimovic te hi en ila, anni ho hi kum 30 an tlin hnuah an ṭha zual zawk emawni tih mai tur a ni. Engkim mai hi kan kuta innghat a nihna a takin an lantir," a ti.

England captain hian an ram chu Euro 2018 khan final a thlenpui a, mahse anmahni ramah ngei final thleng mah se Italy an ngam lo. Kane chuan, "Theih ni se chuan Euro 2028 hi kan ramah ngei champion nih chu duhthusam a ni," tiin a sawi bawk.

Euro 2028 an khelh meuh chuan Kane hi kum 35 mi a ni tawh dawn a, a vanglai hun a liam tawh ang. Chumi hma chuan Euro 2024 leh World Cup 2026 te chu a hmachhawp lian leh beisei a neih sanna tur a ni ang.