Mizoram tan theihtawp kan chhuah dawn - Rinzuala

Mizoram Police defender Lalrinzuala Khiangte chuan Santosh Trophy 2023-ah Mizoram tan theihtawp an chhuah tur thu Vanglaini a hrilh. Mizoramin Santosh Trophy 2014 nomawi an chawi ṭum aṭangin right back Rinzuala chiah hi tun ṭum Mizoram team-ah a tel.

Rinzuala chuan, "Inbuatsaihna nei rei lo mah ila, kan hun neih kan hmang ṭha. Team kan inpawhtlang a, thawhhona pawh a ṭha. Mizoram tan theihtawp kan chhuah dawn," tiin Vanglaini a hrilh.

Mizoram team-ah hian 2018 Santosh Trophy-a Services champion puitu PC Lallawmkima a tel. Samthang tlangval PC-a chuan, "Rilru a pawimawh. Services hi kan hneh ka ring. Ka teammate-te ka ringtawk bawk," tiin Vanglaini a hrilh ve bawk.

PC-a hian Services a champion pui ṭum hian semifinal-a Karnataka an hneh ṭumin goal a khung a, final-a goal awm chhun Bikash Thapa khung chu a siamsak a ni. Samthang tlangval hian 2018 Santosh Trophy final round-ah hian goal nga a khung a ni.

Mizoram hian vawiin chawhma lam hian inelna neihna hmun Amritsar, Punjab an thleng ang a; October 14, Inrinniah nikum semifinalist Services an hmachhawn ang.