Rafael Nadal a lo kir dawn!

Hliam vanga hun rei tak a chawlh hnuah Rafael Nadal chu tennis court-ah a lo kir leh dawn. Australian Open CEO Craig Tiley chuan Melbourne khawpuiah Nadal-a inkhelh tur thu a sawi chiang.

Grand Slam vawi 22 champion tawh Nadal hi kumin tir lam khan Australian Open-ah a inlan a, a hnu lamah chuan hliam vangin a chawl ngar ngar. June thla khan a hliam zai niin tun thlengin a la inkhel leh rih lo.

May thlaa French Open an khelh dawn khan chanchinbumite a kawm a, hemi ṭum hian French Open a khelh loh tur thu leh kum 2024 chu tennis a khelh hun hnuhnung a nih tur thu a sawi bawk - a season tawpna a thleng chho dawn tihna a ni.

Australian Open 2024 hi January thlaah an khel dawn, nakkuma khelh tur ni mah se hun a tam tawh lo. Tournamanet CEO leh director ni bawk Tiley chuan, "Rafa a lo kir leh ngei dawn, he thu hi ama hnen aṭangin kan dawng.

"Player ropui leh danglam bik a ni a, kum 2022 mai pawh khan Australian Open champion a la ni. Ani a lo kir thei tur hian tournament buatsaihtute lam chu min tiphur hle a ni," tiin a sawi.

Spanish star Nadal hi a inkhel thei a nih pawhin atan thil a awlsam vek lo ang, hun rei tak hnuah a inkhel ve leh dawn tihna a ni a, amah ngeiin a lo sawilawk tawh angin champion beisei ngam chi a ni rih dawn lo.

Australian Open CEO Craig Tiley hian Nadal bakah hmeichhe champion lo ni tawh - Naomi Osaka, Angelique Kerber leh Caroline Wozniacki te pawh an inlan dawn tih a sawi a, player ṭha an inlan tur hi an tan chuan chanchin lawmawm a ni ang.