Santosh Trophy : Thlanga hoa champion hmaa Mizoram dinhmun

Kum 2014 khan coach H. Vanlalthlanga hoin Mizoramin a vawi khat nan Santosh Trophy nomawi an chawi a, hemi hmaa Mizoram thlen chin chu a tawi hle. Player-ten theihna an nei a, team anga ṭha taka khelh chhuah an harsat a, Mizoram chhunga league mumal awm loh vangah a ngaih theih.

Chutihrualin 90's chhoa Mizoram football nun lai kha tun thlenga ha hipa sawi a ni a, ramchhung football a nung ṭha hle. Tualchhungah footballer-te an lar êm êm a, Lammual khatin inkhel an en ṭhin. Mahse, state dang nen inkal pawhna leh inbiak pawhna a ṭhat tawk loh avangin Mizoram pawnah hian senior level-ah record ṭha a awm meuh lo.

Kum zabi 21-na

Kum 2000 chhoah Mizoramin team tirh loh ṭumte a nei. Record thlir letin kum 2002-ah chuan Mizoramin team an tir a, Punjab leh Madhya Pradesh te nen group khatah an awm.

Santosh Trophy vawi 58-naah hian Mizoramin Joseph Lalnunzira leh Benjamin Zonunsiama te goal hmangin Madhya Pradesh 2-1 in hneh mah se group match hnuhnung berah Punjab lakah 1-0 in an vanduai. Punjab chakna goal hi minute 88-naa Sher Singh-a khung a ni.

Kum 2004-ah Santosh Trophy vawi 59-na khelh a ni a, Mizoram hi team ṭha Bengal leh Andhra Pradesh nen group khatah an awm. Group khatah record nei ṭha ber Bengal an awm avangin Mizoram tan group stage paltlang a harsa a, point hmu loin an tla.

2005-06 Santosh Trophy

Jawaharlal Nehru International Stadium, Kochi-ah final khelh a ni a, extra time-ah Goa chuan Maharashtra chu 3-1 in an hneh a, Santosh Trophy-ah a vawi li-na atan an champion. Hetihlai hian Mizoram chuan qualifying round an paltlang zo lo.

Mizoram hi Cluster VIII-ah West Bengal, Nagaland leh Andhra Pradesh nen an awm ho a, group khat aṭang hian pakhat chauh tlang tur a ni. An game hmasa berah Andhra Pradesh nen Malsawmtluanga Shylo leh PC Lalawmpuia te goal hmangin 2-2 in an inhnehtawk a, amaherawhchu West Bengal leh Nagaland pawh 2-2 thoa an in draw avangin an dinhmun a la inang vek. West Bengal-in Andhra Pradesh 3-0 in an hneh a, Mizoram-in Nagaland 3-1 in an hneh a, Mizoram tan Mama bakah Jerry Zirsanga leh Vanlalrova te'n an thun. Inkhel hnuhnung berah Mizoram goal difference a chhiat zawk avangin chak ngei an mamawh a, mahse Bengal nen hian 1-1 in an inhnehtawk a, an tla zui bawk. Mizoram tluk loh West Bengal hi an thleng thui bik lo a, quarterfinal-ah Maharastra leh Services nen group khata awmin an tla nghal.

2006-07 Santosh Trophy

Haryana-ah khelh niin Punjab-in final-ah West Bengal hnehin an champion. Mizoram erawh qualyfing round-ah bawk an tla a, kum hmasa aiin an tla chiang zawk.

Mizoram hi Cluster II-ah Meghalaya, Uttar Pradesh leh Andaman & Nicobar Islands nen an awm a. An match hmasa berah ṭhenawm state Meghalaya lakah an tlawm a, goal awmchhun hi a hun laia Indian midfielder langsar ni pha Rocus Lamare thun a ni. Inkhel vawi hnihnaah Mizoram beisei a tawp a, Uttar Pradesh lakah 3-1 a tlawmin goal awmchhun hi Lalsangliana thun a ni.

Inkhel hnuhnung berah, tla chiang tawh Andaman&Nicobar Islands nen an inkhel a, 5-0 in an sawp. Mizoram tan hian Mama leh Sochungmi Raleng-a te'n goal hnih ve ve khungin, Jerry Zirsanga'n goal khat a khung ve bawk. Mizoram tluk loh Meghalaya hian a thlengtu Haryana chu pre-quarterfinal-ah 1-0 a hneh loin an tla nghal.

2007-08 Santosh Trophy

Punjab an champion chiang a, final-ah Kerala 5-0 in an sawp. Inelna hi Jammu & Kashmir-ah a ni a, Mizoram tan result danglam a awm lo a, qualifying round-ah bawk an tla a, mahse an tlak dan erawh a uiawm hle.

Cluster VII-ah Railways leh Chattisgarh te nen group khatah an awm a, an game hmasa berah Mizoram hian Lalhlimthara leh Mama hmangin Chattisgarh 2-1 in an hneh nghal a, beisei a sang nghal viau. An match hnihnaah Railways nen 1-1 a an inhnehtawk avangin Mizoram dinhmun chu inkhel hnuhnung ber result-in a hril a, Railways-in beisei nei tawh lo Chattisgarh 3-0 a hnehin Mizoram hi goal difference-ah an tla zui. Mizoram hneh loh Railways hi pre quarterfinal-ah Goa hneh loin an tla ve lehnghal.

2008-09 Santosh Trophy

Goa an champion a, final-ah Bengal nen goal awm loa an in draw hnuah penalty shootout-ah 4-2 in an chak. Tiruchi, Tamil Nadu-a Santosh Trophy khelhah hian Mizoram team chuan qualifying round an paltlang ve ta a, mahse prequarterfinal-ah champion team Goa hneh loin an tlawm.

Mizoram hi Cluster III-ah Madhya Pradesh, Jammu & Kashmir leh Pondichery te nen group khatah an awm a. An match hmasa berah Pondichery chu 4-0 in an hneh nghal a. Mizoram tan hian Rohmingthanga, Jeje Lalpekhlua, Lalmuanpuia leh Zaidinmawia Hmar te'n goal an khung. An match hnihnaah Madhya Pradesh hmachhawnin minute 8-na lekah Reuben Zosangpuia chu hnawhchhuah a ni a, Sonu Rajak hmangin Madhya Pradesh-in hma an hruai chhunzawm bawk.

Amaherawhchu Mizoram-in Jeje Lalpekhlua hmangin an sut vat a, second half-ah Madhya Pradesh-in hma hruai leh mah se minute 89-naah Captain Zaia'n Mizoram chhanhimin goal pawimawh a khung. He result avang hian Mizoram tan Jammu & Kashmir hneh a tawk a, first half-ah goal khung lo mahse second half-a Muanpuia, Jeje leh Lalrochama te goal hmanga chakin prequarterfinal an lut.

Pre Quarterfinal-ah erawh Mizoram hian Goa an ngam lo a ni ber a, India midfielder chhuanvawr Climax Lawrence hmangin Goa hian inkhel an thunun a, 3-0 in hnehna an chang.

2010 Santosh Trophy

West Bengal hun a inher chhuak a, an khelmual Salt Lake Stadium-ah Punjab 2-1 a hnehin an champion a, Mizoram pawhin quarterfinal an lut ve ta bawk.

Mizoram hi Cluster VIII-ah Railways, Orissa leh Bihar te nen an awm a, an match hmasa berah Orissa 3-1 a hneh loin beisei a chau hle a. An game hmasa berah hian Mizoram hi an khel fuh lo hrim hrim a, 3-0 a an chak loh hnuah Zaidinmawia'n minute 81-naah, goal khat a khung ve hram a, hei hi goal pawimawh a ni zui.

Inkhel vawi hnihnaah Mizoram an insiamṭha a, Bihar chu 10-0 ngawtin an sawp a. Beikhokhei leh F. Lalrinpuia te'n hattrick an siam a, Jerry Zirsanga'n goal hnih khungin Zaia leh R. Lalnundanga te'n goal khat ve ve an khung bawk. Game hnuhnung berah Mizoram-in Railways hneh ngei an mamawh a, minute 33-a Lalrinfela goal hmangin hnehna an chang. Mizoram, Railways leh Orissa te'n point ruk ṭheuh an hmu a, Railways leh Mizoram te hi goal difference inangah Mizoram hi an vannei ta zawk a ni.

Pre Quarterfinal-ah Mizoram in Kerala an hneh a, goal awmchhun hi Beikhokhei-a thun a ni. Quarterfinal-ah Tamil Nadu, West Bengal leh Delhi te nen group khatah awm hoin pahnih tlang tur a nih avangin beisei a sang viau. Mahse, Mizoram an mualpho a, match hmasa berah Tamil Nadu lakah 2-0 in an tlawm nghal a. Match hnihnaah beisei la nei mahse a thlengtu West Bengal chuan 7-1 ngawtin an sawp a, F. Lalmuanpuia'n Mizoram tan goal a khung ve hram. Inkhel hnuhnung berah goal awm lo a, Delhi an draw zui avangin Mizoram hi group mawngphahah an awm.

Mizoram group aṭanga pahnihna West Bengal an champion a, group winner Tamil Nadu erawh Punjab hneh loin semifinal-ah an tla.

2011 Santosh Trophy

Manipur-in final an thleng a, mahse, West Bengal lakah 2-1 in an tlawm. Bengal champion zawn kum hian Mizoram chuan qualifying round an paltlang zo lo.

Mizoram beisei a sang ve tawh viau a, quarterfinal an thlen tawh avangin semifinal thlen ngei an tum tawh. Mahse chu tumna chu Tripura lakah a thamral. Mizoram team hi Cluster VII-ah Haryana, Madhya Pradesh leh Tripura te nen group khatah an awm ho a, an match hmasa berah mak tak maiin Tripura lakah 3-1 in an tlawm nghal. Mahse, Mizoram team an tho leh a, Madhya Pradesh 8-0 in an sawp a, an match hnuhnung berah Haryana 5-0 in an sawp bawk. Mizoram team enkawltute chuan pre quarterfinal tlang angah an inngai a, mahse an hre sual. Hemi kum aṭang hian a vawikhatna atan goal difference aiah head to head en a ni a. Mizoram hian Tripura an hneh loh an tuar a, Tripura aiin goal difference-ah goal ruk ngawtin ṭha mah se an tla tho.

Tripura a thleng thui chuang lo a, pre quarterfinal-ah Railways hneh loin an tla ve leh nghal.

2012 Santosh Trophy

Services an champion a, final-ah Tamil Nadu 3-2 in an hneh. Mizoram pawhin quarterfinal an thleng ve leh ta a, mahse semifinal an thleng zo lo.

Mizoram hi cluster VI-ah Uttarakhand leh Rajasthan nen an awm ho a, heng team pahnihte hi awlsam taka hnehin quarterfinal an lut a. Quarterfinal-ah Tamil Nadu, Railways leh Delhi te nen group khatah an awm ho a, Mizoram tan semifinal thlen hi a theih tih a chiang.

Amaherawhchu Mizoram hian match hmasa berah Railways nen 2-2 in an inhnehtawk a, Mizoram hi a suttu zawkah ṭang zelin V. Lalṭanpuia leh F. Lalrinpuia (Valpuia) te'n goal an khung. Inkhel vawi hnihnaah Tamil Nadu nen inkhelin he inkhel hian tun thlengin sawi zui a la hlawh. Mizoram hian Valpuia goal hnih hmangin minute 22-na lekah hma an hruai a, mahse Tamil Nadu hian an goal phurh hi an sut leh vek a. Lalchhawnkima'n red card a hmuh hnuah Tamil Nadu-in hma an hruai a. Mahse Mizoram an beidawng lo a, Lalbiakhlua hmangin hun tawp dawnah an sut leh a. He goal hmang hian semifinal lut thei mahse injury time-ah Tamil Nadu-in Ramesh-a hmangin chakna goal an khung a, Mizoram beiseina a tawp zui bawk. Inkhel hnuhnung berah beisei nei tawh lo Mizoram hian Delhi lakah 3-0 a tlawmin, group mawng phahah an awm.

2013 Santosh Trophy

Mizoram hi qualifying round-ah Uttar Pradesh leh Maharashtra nen group khata awmin, pahnih tlang tur a nih avangin a awlsam hmel hle. Mahse, Mizoram hian an match hmasa berah Maharashtra 1-1 in an draw a, an match hnihnaah Uttar Pradesh lakah 1-0 a an tlawm leh avangin quarterfinal an lut zo lo.

2013-ah hian Services an champion a, top scorer chu Mizo tlangval Lallianmawia a ni. Mizoram Premier League a awm tawh a, Santosh Trophy-ah Mizo tlangval Lianmawia a che ṭhat bawk avangin Mizoram hi first round-ah tla mah se champion theih inbeiseina a piang ṭan.