Birmingham City boss thar Wayne Rooney

Championship club Birmingham City chuan an coach atan Wayne Rooney an la lut a, kum 37 mi coach hian kum thum chhung atan contract a ziak - coach ban tak John Eustace a thlak dawn a ni.

Rooney hi American firm Shelby Companies Limited-in July-a Birmingham an lei hnua coach atana an lakluh hmasak ber a ni a, English striker ropui ṭhin tan club pathum a enkawlna tur chiah a ni thung ang.

Manchester United legend hian inkhelh a chawlhsan hnuah Championship club Derby County leh MLS club DC United a lo enkawl tawh a, beiseina sang tak nen Birmingham hian an lo thlir dawn a ni.

Blues neitu zinga mi leh club chairman ni bawk Tom Wagner chuan, "Wayne hi hnehtu rilru pu sa a ni a, a coaching staff, club leh fan-te puihnain kan beisei ram min hruai thleng ang tih kan ring tlat a ni," a ti.

Rooney ṭhiante

Everton chhulchhuak Rooney hian amah chauhin Birmingham hi a zawm mai lo a, hruai tel a nei. Chung zingah chuan England tana a khelhpui ṭhin leh England Under-21 assistant coach ni lai Ashley Cole chu langsar a ni.

Ani bakah hian United-a Rooney nena khel dun ṭhin John O'Shea chuan a ṭhianpa hi coaching staff zinga telin a pui dawn bawk a, O'Shea hi Republic of Ireland national team-ah assistant coach a ni bawk.

Rooney hian MLS club DC United lama a hnathawh laia amah thlawptute pawh a theihnghilh lo. Washington club-a a assistant pahnih Carl Robinson leh Pete Shuttleworth chuan English club-ah pawh Rooney hi an pui zel dawn.

Birmingham City hi Championship table-ah parukna an ni mek a, Rooney hoa season thara Premier League khelh phak an beisei ang - October 21-a Middlesbrough an lenchilh tur chu Rooney tan hna hmasa ber a ni ang.

Beiseina

Rooney hian January 2021 khan inkhelh chawlhsanin, Derby enkawl hna a thawk ṭan a, Pride Park-ah hian thla 18 hun hmang hman mah se club inrelbawlna fel lo avangin club an talbuai hle a, point 21 paihsak an ni hial - League One-ah an tla a, June 2022-ah a bang.

July 2022 khan Rooney hian a club hlui DC United a zawm zui a, mahse, playoff khel tura an inpetkai zawh loh avangin inhriatthiam tawnnain an inṭhen - Blues lawmah a lo tla a, a zawm ta.

Rooney chuan, "Hetiang ang hun duhawm taka Birmingham City ka zawm thei hi ka lawm hle. Hmachhawp mumal tak neiin, an tumte a hlawhtlin theih nan theihtawp an chhuah a ni," a ti a, hnathawk tura a inpeih thu a sawi bawk.

English coach chuan sawi zawmin, "Club hmachhawp hian min tiphur a, hnathawh ka châk tawh hle. Team khelh dan tura duh dan mumal tak ka nei a, chutianga kan khelh theih nan chuan ka coaching staff-te nen theihtawp kan chhuah ang," a ti a, hnehna chang ṭhin team din an tum thu a sawi zui.