Barca-in Thiago an thlithlai

Spanish champion Barcelona chuan an player hlui Thiago Alcantara lak let dan an ngaihtuah dawn niin Spanish media-te chuan an tarlang a, Thiago hi season tharah Catalan club tan a khel a nih pawhin a mak lo ang.

Kum 33 mi Thiago hi hliam vangin tun season-ah Liverpool tan a la inlan lo a, season tawp rualin a contract a hmang zo tawh dawn bawk. Tuna a lan danah chuan Reds hian Spanish midfielder hi contract thar an zawrh a rinawm lo.

Spanish chanchinbu Sport chuan hetiang a nih avang hian Barca chuan uluk takin an player hlui hi an thlithlai mek niin a sawi a, sum lama talbuai club hian free transfer-a lakluh theih player tun aṭangin an veh ṭan niin a lang.

Kum 32 mi Thiago hi Barcelona academy aṭanga inzir chhuak niin, Barcelona tan 2009-2013 inkar a khel a, July 2013 khan Bayern Munich a zawm. Barca-ah hian La Liga nomawi pali, Copa del Rey (1), Supercopa de Espana (2), Champions League (1), UEFA Super Cup (1) leh FIFA Club World Cup (1) nomawi a chawi.

Catalan club tan hian inelna hrang hrangah match 101 khelin goal 11 a khungsak a, assist vawi 20 a nei. Barca a chhuahsan hnuah pawh a hlawhtling zel - Bayern tan Bundesliga nomawi pasarih chawiin, DFB-Pokal ((4), DFL-Supercup (2), Champions League leh FIFA Club World Cup (1) nomawi a chawi.

Bayern tan hian match 235-ah goal 31 khungin assist vawi 37 a nei a, September 2020 khan pound maktaduai 20-in Reds a zawm - a man zat hi a khelh ṭhat dan a zira £5mtd pek belh tura tih a ni nghe nghe.

Mahse, Thiago hi Reds a pan hnuah hliamin a tlak buak nasa a, Liverpool-ah FA Cup leh FA Community Shield bak nomawi chawi a la nei lo. Kum 2022 khan Champions League final luhpui mah se, final-ah Real Madrid ngam loin an tlawm.

Thiago hian season hmasa zawh dawn ruaiah khan a khel bawrah hliam a tuar a, May thla khan zai a ni. Hemi hnuah hian khelmual a la rap leh ta lo a, tun season-ah pawh a hmel hmuh tur a la awm lo a ni.