Spurs technical director thar Lange

Premier League hmahruaitu Tottenham Hotspur chuan an technical director atan Johan Lange an ruat, ani hi tun hma lam chuan Aston Villa tana global director of football development hna lo thawk tawh a ni.

British chanchinbumiten an tarlan dan chuan Lange hian Fabio Paratici-a hmun ruak a luah ang, kumin tir lam khan Paratici hian Spurs managing director of football a nihna a lo bansan tawh.

Juventus tana hna a thawh laiin Paratici-a hian player lei leh hralh chungchangah dan bawhchhiat a nei nia sawi a ni a, hei vang hian Italian Football Federation chuan thla 30 chhung atan an hrem a, hrem a nihna hi khinglet mah se an hnawlsak.

Spurs chuan thuchhuah siamin, "Kum 2023 November 1 aṭangin Johan Lange chu technical director a ni ang. Lange-a hi player lakkhawm leh chik taka zirchianna lam mi bik a ni a, senior bakah player naupang zawkte hrechiang êm êmtu a ni. Ani hoa hna kan thawk thei tur hi a lawmawm takzet," an ti.

Season hmasa khan Spurs hian beisei an phak lo. Premier League-ah pariatna an ni a, hei vang hian tun season kal laiah European football pawh an khel phak lo, an captain Harry Kane a chhuak zui bawk.

Mahse, coach Ange Postecoglou enkawlna hnuaiah beisei phak baka ṭhain season bul an ṭan. Manchester United, Arsenal leh Liverpool an hmachhawn tawh chungin EPL hmahruaitu an ni mek, an phur vanglai tak a ni.