Cricket World Cup record siamtu Pakistan an chak

Pakistan chuan Thawhlehni khan Cricket World Cup chanchina target um phak sang ber record an siam a, Sri Lanka lakah wicket rukin hnehna an chang - Pakistan hian match hnih an khelhah hnehna an la chang ve ve tihna a ni.

Rajiv Gandhi International Stadium, Hyderabad-a inkhelah hian Sri Lanka-in over 50-ah run 344 tehmeuh an siam a, wicket kua an hloh - Pakistan tan um phak a harsa ang tih a chiang a, fans tam tak an beidawng.

Mahse, khelmual chhungah Pakistan player-te an beidawng ve duh lo a, over 48.2-ah target khumin wicket li chiah an hloh a, heti zata run tam hi eng team mahin World Cup-ah an la um phak ngai lo.

Kum 2011 khan Ireland chuan England laka an target run 328 chu um phakin, World Cup-a target um phak sang ber record an lo siam tawh - he record hi Pakistan-in an thai chhe ta a, October 14-a India hmachhawn turin an inpeih tawh tih thiltih hmangin an lantir.

SL beiseina

Ṭhum vawra vannei zawk Sri Lanka-in bat hmasak an thlang a, an bul ṭan dan enin an tisual lo niin a lang - bul ṭantu Pathum Nissanka chuan run 51 a rawn siam nghal a, Kusal Perera chu run siam miah loin a 'out' thung.

Mahse, Sri Lanka tan century vaw chhuak thei pahnih an awm a, Kusal Mendis leh Sadeera Samarawickrama ten century an rawn vaw chhuak ve ve a, an che pui hle - Mendis hian run 122 tehmeuh a rawn siam a, Sadeera hian run 108 a siam thung.

Sri Lanka hian over 50 tlinin, wicket pakua an hloh a, run 344 ngawt an vaw chhuak - Pakistan tan Hasan Ali-a'n wicket li a la tih loh chu bowler dang an che hleithei meuh lo a, Sri Lanka tan chak beiseina a sang takzet.

Lions (Sri Lanka sawina) hian an match hmasa zawkah South Africa an lo ngam lo tawh a, hei vang hian semifinal luh beiseina nei tur chuan an tan chak ngei hi a pawimawh tel bawk.

Mahse maw...

Sri Lanka-in target an tuk tam tawkah an ngai a, mahse, Pakistan-in India leilungah tlawm an lo duh hauh lo - Shaheens (Pakistan sawina) tan Abdullah Shafique chuan ball 103 lekah run 113 ngawt a rawn vaw chhuak nghal a, a team tan beiseina a siam.

Pakistan hi talbuai lai nei lo bik erawh an ni lo. Imam ul-Haq (12) leh captain Babar Azam (10) te chu run sawi tham an siam hmain an 'out' a, Shafique-a 'form' chu Pakistan tan innghahna a ni.

Mahse, kum 23 mi batter hi a mal ṭan reng lo. Pakistan wicketkeeper awm tawh zinga ṭha ber ang hiala tam takin an ngaih Mohammad Rizwan a rawn ding chhuak ve leh a, ball 121 a hmachhawnah run 131 zet a rawn vaw chhuak!

Rizwan hian a tawp thlenga 'out' loin Pakistan tan hna ṭha a thawk a, Saud Shakeel (31) leh ball 10 leka run 22 siama a tawp thleng dam Iftikhar Ahmed ten an rawn pui ṭha bawk - over 48.2-ah wicket hnih chauh hloh chungin Pakistan an chak zui a, kumkhaw sawi a tling tawh ang.