India hockey champion Mizoram

Hockey hmanga India ram pum huap inelna 29th Charanjit Rai Junior Nehru Girls Hockey Tournament for Under 17 neih zawh takah - Mizoram aiawha feh chhuak Govt. Lallengvunga H/S Thenzawl chuan CM Excellent Bariatu Ranchi, Jharkhand chu 4-3 a hnehin an champion.

Champion Mizoram hian nomawi bakah sum fai Rs 1,60,000 (player tin tan Rs 10,000 ṭheuh) an dawng. Hockey Mizoram tan chun hun chhinchhiah tlak bik a ni a, an champion theih nana thawhhlawk tak Laltlanchhungi chu 'Women of the Match' atan thlan a ni a, coach B. Lalroṭhuami chu 'Best Coach' atan thlan a ni bawk.

Hlawhtlinna

Nilaini tlaia final inkhelah Mizoramin penalty chawiin Jharkhand lamin an khung a, mahse chawlhlawk hmain Malsawmsangi leh Laltlanchhungi te goal hmangin Mizoram lamin an chhanglet.

Quarter thumnaah Jarkhand-in penalty corner chhawr ṭangkaiin si phurh an sut a - Malsawmsangi bawkin Mizoram hma a hruai pui leh thung. Tlawm duh bik lo Jarkhand lamin sut ve leh mah se, hun tawp hma deuh chiahin Laltlanchhungi chuan champion theihna goal a khung.

Junior Nehru Tournament final thleng tur hian Mizoram hi seeded team niin 3rd Phase aṭangin bul an ṭan. 3rd Phase hi pool pahniha ṭhen niin an pool-ah Bathinda Punjab 6-0, Hissar Haryana te 10-2 in an sawp a, pool champion an ni.

Semi final-ah Gwalior Madhya Pradesh nen goal awm lo a an inhnehtawk hnuin penalty shootout-ah 3-2 a hnehin final an in hlangkai. Nomawi inchuhna inkhela an hneh tak Jharkhand hi hneh loh nei loa final thleng an ni a, team ṭha ni mah se Mizoram an chungnung ta zawk.

Lawmthu

Lalremsiami Hmar lo chher chhuak tawhtu B. Lalroṭhuami (Bte-i) chuan, "Tournament khel tur hian theihtawp kan chhuah a, champion nomawi chawi tum hian kum dangah pawh kan lo feh chhuak tawh ṭhin, kuminah kan hun a thleng ve ta hi a lawmawm takzet.

"Tun hma pawhin semifinal te pawh kan lo thleng tawh ṭhin a, mahse a vanduai zawkah kan ṭang leh ṭhin. Tunah chuan player leh coaching staff zawng zawng thawhrimna chu a hlawhtlinna kan chang ve ta a ni," tiin Vanglaini a hrilh.

Mizoram hian kum 2005 khan final an lo lut tawh a, mahse silver medal an dawng - a hnu kumah bronze medal an la leh bawk. Tuna Mizoram champion puitu coach Bte-i hi silver medal an lak ṭum hian player a la ni, tunah chuan coach ni chungin a champion pui.

Tun ṭuma India champion ni thei Mizo tleirawlte hi SAI Women Hockey Training Centre Thenzawla inzir vek an ni a, tun ṭumah hian Govt. Lallengvunga H/S Thenzawl hmingin an tel. Inelna hmunah hian SAI leh Mizo awmten an ṭawiawm ṭha hle.