Inelna hmachhawn turin kan inpeih - Maenga

Mizoram manager K. Lalenghluna (Maenga) chuan Santosh Trophy hmachhawn tura an inpeih thu a sawi a, 2014 Santosh Trophy champion Mizoram hian match hmasa berah nikum semifinalist Services chu October 14, Inrinni zing dar 8:00-ah an hmachhawn ang.

Maenga chuan, "Mizoram chhunga ni 11 chhung inpuahchahna hun kan neih kan hmang ṭha a, kan zin kawng kan tluang viau bawk. Coach leh player-te ka ringtawk a, inelna hmachhawn turin kan inpeih tawhah ka ngai," tiin Vanglaini a hrilh.

Mizoram team hian October 10, Thawhlehni khan thlawhtheihnain Kolkata an pan. Thawhlehni zan hian Howrah aṭangin relin Amritsar an pan nghal a, train route thlak vangin darkar riat vel zetin an thlen tlai phah. Zan hnih leh ni hnih chhung rela an chuan hnuah nizan khan Amritsar an thleng.