Badminton tan thawhhona ṭha

TATA Trusts, North East Initiative Development Agency (NEIDA), Pullela Gopichand Badminton Academy (PGBA) leh Mizoram Badminton Association (MBA) te chuan "Badminton Initiative Mizoram" tih hnuaiah an thawkho dawn a, thawhhona hi kum hnih leh a chanve tur a ni ang.

Thawhhona chungchanga sum hman dan tur leh programme kalpui dan tur sawi hoin PGBA Conference Hall, Hyderabad-ah October 11, Nilaini khan neih a ni. Meeting-ah hian MBA aiawh in honorary secretary Lalrinzuala Pachuau a tel a, NEIDA aiawh in B. Lalrinkima a tel bawk.

He thawhhonaah hian Regional Development Centre chu Pullela Gopichand Intensive Training Centre (PGITC) tia hming thlak a ni a. Ngawrh lehzual a training kalpui a nih dawn bakah heta awm te hi kum tin vawi thum, PGBA-ah training nei tura hruai an ni ṭhin ang. PGBA-ah hian Mizo badminton coach tur lak belh a ni dawn bawk. Thawhhonaah hian cheng vaibelchhe 3.8 vel an seng tura ruahman a ni.