France tan vawi khat chak a tawk - an hmaah Netherlands!

Euro 2024 khel turin France-in vawi khat chak chiah an mamawh tawh a, an hmaa ding erawh Netherlands an ni - zanin dar 12:15-ah Netherlands hian Euro qualifier khel turin France an mikhual dawn a, Dutch team tan dam khawchhuahna turin chak a ngai ve bawk.

France hian tun inelnaah match nga khel tawhin an la chak fai vek a, an lamah goal a la lut lo - goal 11 an khung tawh thung. Hei hian Didier Deschamps-a team ṭhatzia a hrilhfiah a, Netherlands tan a harsa dawn.

Dutch team hian match li khel tawhin point kua an nei mek a, pathumna Greece nen an point hmuh zat a inzat - Greece hi match khatin an khel tam thung a, Netherlands hi an tlawm a nih chuan Greece tan kawng an hawng zau sawt dawn tihna a ni.

A tawi zawnga sawi chuan France tan tuna chak a, hahdam taka Euro inpetkai mai chu thil châkawm a ni a, Netherlands tan an nun khawchhuahna tura an beih a ngai thung - a hmuhnawm lo thei lo ang.

Thawnthu hlui

March thla khan France khelmualah Netherlands an leng a, Les Bleus hian 4-0 in an lo sawp - Netherlands tan a mualpho thlak a, an tiahpui nia an ngaih laka an tlawmna hi Dutch fan-ten an la na ngawih ngawih.

Mahse, Netherlands an insiamṭha chiang hle. France an ngam loh hnua qualifier match thum an khelhah an chak vek a, Gibraltar (3-0), Greece (3-0) leh Republic of Ireland (2-1) te hneh zuiin, Euro 2024 khel turin beiseina an insiam.

Netherlands coach Ronald Koeman chuan France lakah an chak theih a beisei thu sawiin, "Kar tinin result mak tak tak chu ka hmu reng alawm. Zirtawpni zanah France tana harsatna thlenin, result ṭha tak kan neih theih ka beisei," a ti.

Dutch team hian fans puihna an neih tel theih dawn avangin intawnna hmasa nen chuan boruak a danglam tura ngaih a ni a, chutihrual chuan Euro qualifier match kara Nations League an khelhah Croatia (4-2, semifinal) leh Italy (3-2, third place) an ngam lo tih hriat a ṭha.

Beiseina neitu

Koeman-a lu tihaitu pakhat chu player inhliam an ngah lutuk hi a ni - midfielder pawimawh Frenkie de Jong a inlan thei dawn lo a, tlarhmaa Cody Gakpo leh Memphis Depay awm lo tur pawh Netherlands tan chuan chânna lian tak a ni.

Hei chauh a ni lo, goalkeeper Mark Flekken, Steven Berghuis leh Teun Koopmeiners te pawh hliam vangin an inhnukdawk leh vek a, Netherlands hian an ṭhat dan berin team ṭha France hi an lo mikhual dawn lo.

Mahse, Koeman chuan beiseina an neih tlat thu sawiin, "Kan ṭhat dan berin kan inlan dawn lo tih kan hria. Mahse, chu chuan football-ah awmzia a nei lo - kar tin deuhthaw hian result mak tak tak, engtin nge a thlen zawk theih? tih tur hi ka hmu fo a ni," a ti.

Koeman-a'n thil mak leh beiseina nen result ṭha a beisei a, a thleng lo ang tih a sawi theih loh - France team-in hliam vang thoin an ṭhat dan berin Netherlands an pan dawn bik lo.

France thlirna

Deschamps-a'n hliam vangin Wesley Fofana, Presnel Kimpembe, William Saliba, Dayot Upamecano, Jules Kounde leh Axel Disasi te a squad-ah a nei thei bik lo a, tlarhnung lamah duhthlan tur a ngah dawn lo.

Chutihrual chuan September international break-a hliam vanga inlan thei lo Ibrahima Konate leh Jonathan Clauss an lo kir tawh a, Deschamps tan tlem chu a zia deuh - tlarhmaah tawnhriat nei ṭha Olivier Giroud hoin Ousmane Dembele leh Kylian Mbappe te an awm bawk.

Netherlands tana lawmna tur pakhat erawh Dembele leh Mbappe hi an 'form' lai a ni lo a, anmahni rau rauah tun hi hmachhawn an châkawm lai tak a ni mai thei - Paris Saint-Germain match hnuhnung paliah Mbappe hian goal a khung tawh lo!

Kum 26 mi Dembele-a'n Barcelona-in an ui chung chungin Catalan club a mangṭha a, an ram club zawm a thlang. Mahse, tun season-a match kua a khelh tawhah goal a la khung miah lo a, assist vawi hnih a nei thung - player pahnih 'form' lo hi France tan a pawi thui thei.