Mizoram an champion ta, mahse...

Mizoram Premier League Season 1-na tawp lamah Chanmari FC-in H. Vanlalthlanga an la lut a, coach tawnhriat nei ṭhain Chanmarians result ṭha a neihpui. MPL2-ah Thlanga hoin an che ṭha leh bawk a, Mizoram Football Association-in Mizoram team enkawl turin Thlanga a thlang.

Mak ang reng tak erawh tualchhung football-a sulhnu nei ṭha tak Thlanga hian Mizoram team hi Santosh Trophy-ah a la enkawl ngai lo a, a vawi khat hruaina a ni.

Aizawl-ah Santosh Trophy

MFA hruaitute AIFF-ah an tla tlum zel a, kum 2014 hian Mizoramin qualifying round an thleng. Lammualah qualifying round hi khelh a ni a, Mizo mipuiin nomawi an duh bawk a, Mizoram team-in ṭawiawmtu an nei ṭha hle.

Mizoram hian Nagaland leh Arunachal Pradesh te an hneh hnuin group match hnuhnung berah Manipur an hmachhawn. Manipur hian goal difference an neih ṭhat zawk avangin final round lut turin draw a tawk.

Lammualah mipui an khat vek a, Manipur an ṭang khawng thei hle. Draw chauh an mamawh avangin hun an khawhral nasa a, minute 80-ah pawh goal a la lut lo. Minute 82-naah R. Laldanmawia a rawn inlar a, chakna goal pawimawh a rawn khung. Captain Zico Zoremsanga'n injury time-ah chak nemnghehna goal rawn khung lehin Mizoram 2-0 in an chak.

Nomawi chu

Siliguri-ah final round khelh a ni a, qualifying round-ah goal 10 khung a, goal khat pawh chhuah lo Thlanga kaihhruai Mizoram an che ṭha zel. Mizoram hi Kerala (3-1), Maharashtra (2-0), Services (4-1) leh Uttarakhand (2-1) te nen group khatah awmin an chak vek.

Semifinal-ah Mizoramin Tamil Nadu an hmachhawn a, Reagan-a goal hmangin Tamil Nadu-in an khung hmasa zawk. David Lalrinmuana hmangin Mizoramin si phurh an sut hram. Extra time khelh a ni a, team ṭha zawk Mizoramin Zico leh F. Lalrinpuia te goal hmangin hnehna an chang.

Final-ah Mizoramin Railways an hmachhawn a, Zico-a'n hun chanve hmalam leh hnu lamah goal khungin Valpuia'n injury time-ah a khung leh bawk. Mizoram hi 3-0 in an chak a, a vawi khat nan Santosh Trophy-ah an champion. Mizo mipui an hlim a, Lammualah champion hmuahna pawh a ropui hle.

Vanduainain a zui

Champion hnuah Mizoram hi team ṭha zinga mi an ni nghal a, record pawh an nei ṭha chhunzawm. Thlanga ho bawkin kum 2015-ah an zin chhuak a, mahse an vanduai.

Final round an luh hnuah hneh loh nei loin semifinal an lut. Amaherawhchu semifinal-ah Punjab nen 1-1 in an inhnehtawk a, extra time khelh hnuah pawh an inhnehtawk. Penalty shootout-ah pawh player zawng zawngin an pet vek a, Punjab hi 12-11 in an vannei ta zawk.

Mizoram tan final round thlen chu thil harsa a ni tawh lo a, kum tinin an tling chho ve zel. Kum 2016-ah erawh Maharashtra leh Services te an tluk loh vangin semifinal an thleng zo ta lo.

Kum 2017-ah pawh Mizoramin final round an lut a, semifinal an thleng hial. Mahse, coach Lalsangzuala Hmar kaihhruai Mizoram team chu semifinal-ah West Bengal lakah an vanduai a, goal awm loa an inhnehtawk hnuin penalty shootout-ah 6-5 in an chak lo.

Coach Sanga bawkin kum 2018-ah Mizoram team a hruai a, semifinal a thlenpui. Mahse, Kerala lakah Mizoram an vanduai a, 1-0 in chak lo. Kum 2017 leh 2018 hian Mizoram hneh loh an champion ve ve.

A hniam zawngin

Kum 2018 hnu lamah erawh Mizoram an che ṭha zui ta lo. Kum 2019-ah Mizoramin qualifying round an thleng leh a, Lammualah Meghalaya hneh loh vangin final round an lut zo lo.

Kum 2019 hian September thlaah qualifying round khelh leh nghal a ni a, hemi ṭum hian Lalremtluanga leh T. Vanlalhluna hoin Mizoramin final round an lut. Amaherawhchu Covid-19 vangin final round khelh a ni lo.

Covid-19 vangin inelna a khaihlak a, kum 2021-ah Manipurin qualfiying round a thleng. Mizoramin Nagaland leh Tripura an hneh avangin final round lut turin match hnuhnung berah Manipur draw a tawk. Mahse, Mizoramin 1-0 in Manipur an hneh lo a, final round an lut zo lo.

Nikum khan inelna kalhmang thlak hret a ni a, zone hmanga qualifying round khelh chu tihtawp a ni. Kerala-in qualifying round an thleng a, Mizoramin an group-a awm Jammu and Kashmir, Bihar, Rajasthan leh Andhra Pradesh te an hneh vek.

Final round lut turin Mizoram tan inelna thlengtu Kerala draw a tawk. Mahse, Kerala hian Mizoram hi 5-1 in an sawp. Group paruk aṭangin pahnihna zinga tiṭha pathum an tling leh a, Mizoram hi palinaah chiah awmin an vanduai.

A tawi zawngin Mizoramin kum 2018 hnuah final round an la lut leh lo. Santosh Trophy hi football bik atana National Games khelh theihna a ni a, India ram football-a Mizoram dinhmun tihsan leh nan Santosh Trophy-a chet ṭhat hi a pawimawh hle.