India tana kawng sialtu Rohit

India-in captain Rohit Sharma century hmangin Afghanistan chu wicket riatin an hneh a, Cricket World Cup-a an hmachhawn leh hmasak ber tur chu an hmelma Pakistan an ni.

October 11, Nilaini khan Delhi-ah India-in Afghanistan an hmachhawn a, Hashmatullah Shahidi hote hian bat hmasain 272/8 runs siam mah se over 35 lekah 273/2 runs siamin hnehna an chang.

Bul ṭan ṭha Afghan

Arun Jaitley Stadium-ah Afghanistan-in bat hmasak an thlang a, bul pawh an ṭan chhe lo. Opener pahnih Rahmanullah Gurbaz (21) leh Ibrahim Zadran (22) bakah Rahmat Shah (16) ten kawng an sial.

Captain Shahidi (80) leh Azmatullah Omarzai (62) te an inkawp ṭha a, over 35-naah 184/3 vaw chhuak tawhin India bowler te an talbuai hman. Hardik Pandya-a'n Omarzai a rawn vawm hlum hlauh a, Afghanistan an talbuai zui.

A khat mawi tawkin Afghanistan-in wicket an hloh a, 300 pawh vaw chhuak thei tura ngaih kha 272 runs chauh an siam. Chutihrualin Afghanistan tan India laka 272 runs siam hi a chhe lo.

India tan Jasprit Bumrah bawk a rawn che ṭha a, wicket li a lak bakah 39 runs chauh a pe. A tawp lam wicket pathum hi Bumrah lak a ni.

Rohit 'Show'

Rohit Sharma leh Ishan Kishan ten bul an rawn ṭan a, inhliam vanga Shubman Gill tun inelnaa a inlan theih dawn loh avangin Ishan Kishan tan a pawimawh lehzual.

Mahse, Rohit a langsar hle. India captain chauh hian a bat emaw tih theih tur a ni a, Rohit hian Afghanistan bowler te ball vawm chu kil tinah a vuaksak a ni ber.

Ishan pawh a hna a rawn thawk a, Rohit a chet ṭhat theih nan ṭha takin a thlawp. Ball 47 a hmachhawn bakah 47 runs a siam hman. Rohit erawhin 84 ball lekah 131 runs a siam a, tun World Cup-a India tana century siam hmasa ber a ni.

India captain hian World Cup-ah century vawi sarih siam tawhin WC-a century siam tam ber a ni a, Sachin Tendulkar-a record a khum. Century siam tur hian ball 63 chauh a mamawh a, Indian zinga WC-a century siam rang ber record a siam.

Rohit hian six vawi nga a vua a, six vawi thum a vuak khan international cricket-ah six vawi 554-na niin Chris Gayle a record a khum bawk.

Kohli a rin tlak

Rohit Sharma-a'n bul a rawn ṭan ṭha a, Virat Kohli-a'n a tawp a rawn khar ṭha. Kohli hian ball 56-ah 55 runs a rawn siam a, Australia an hneh ṭumia 85 runs a siam bawk avangin tun inelnaa India tana run siam tam ber a ni mek.

Kohli hian IPL-ah Afghan bowler Naveen-ul-Haq nen boruak an nei a, World Cup-ah erawh Kohli hian mipui chu Naveen au el lo turin a ngen zawk. Kohli hi Delhi tlangval a ni a, an khelhna stadium-a pavillion pawh hi Kohli Pavillion tih a ni.

Kohli hian an vawk lal lenna hmun hi Naveen laka phuba lak nana hmang loin inṭhian ṭhat nan a hmang ta zawk. A chet dan avangin Kohli hian fak a hlawh hle.