Ronaldo-a'n World Cup chawi a duh

Spanish radio station lar Cadena COPE chuan tun hnai khan Cristiano Ronaldo-a'n inkhelh chawlhsan mai a la tum lo niin an sawi a, Ronaldo hian a club khelh mekna Al Nassr chu kum 2027 thleng khel tura a contract pawhsei a duh thu a hrilh niin an sawi.

Cadena thuchhuah hi a rintlak a nih chuan Ronaldo hian World Cup 2026 pawh a la khel thei dawn tihna a ni a, Portugal national team lam pawh a thutlukna hi a hrilh vek tawh niin sawi a ni - United States, Canada leh Mexico-in an inthlen ṭawm tur World Cup-ah inlan a la tum hle.

Kum 38 mi Ronaldo hian kum 2027 thleng a contract a pawtsei a nih chuan kum 41 thleng chu professional football a la khel dawn tihna a ni a, Lionel Messi nena an inelna thawnthu tihtawp mai a la tum lo.

January 2003 khan Ronaldo hian Saudi club Al Nassr a zawm a, kum khatah pound maktaduai 177 a hlawh mek - Saudi Pro League club-ah hian kum 2025 thleng khel turin contract a nei mek a, nakkum Euro bak major tournament khel tawh lo tura ngaih ni mah se World Cup 2026 khelh a la tum hle niin a lang.

Real Madrid legend Ronaldo hian ram tan match 201 khela goal 123 ngawt khungin, international football-a goal khung hnem ber a ni mek a, a la champion lohna World Cup-a champion châkin a la tuihal reng.

Ronaldo hi tunah pawh Portugal camp-ah awm mekin, Euro 2024 qualifier match khel turin a inpuahchah a, zanin dar 12:15 hian Slovakia an mikhual ang.

Portugal hian match ruk khel tawhin hnehna an la chang vek a, goal 24 ngawt khungin an lamah a la lut miah lo. Zaninah group J-a pahnihna ni mek Slovakia an hneh chuan Euro 2024 khel turin an inpetkai dawn a ni.