Thudik tawk lo an sawi nasa - Lukaku

Chelsea aṭanga AS Roma-a loan-a khel mek striker Romelu Lukaku chuan nipui transfer laia club hrang hrang nena sawi zawm a nih chungchang a sawi chhuak a, a chungchang thuah thudik tawk lo sawichhuah a tam thu a sawi.

Lukaku hian season hmasa khan Inter Milan-ah loan-a khelin hun a hmang a, Champions League final an khelh theih nan tha a thawhhlawk hle. Italian club hian a ngheta lakluh an duh a, mahse, an hmelma Juventus nen indawr anga sawi a nih avangin Inter hi lungawi loin an inhnukdawk.

Khawthlang media-ten an tarlan dan chuan Lukaku hian Juventus hi zawm turin inremna a neihpui vek tawh a, kum thum chhung atana contract ziakin, kum khat dang pawhsei theih tura tih a ni.

Mahse, Juve fans tam takin Lukaku an duh lo a, Belgian striker lakluh tumna awm chu an duh lohna an lantir nasat avangin Juve hi an inhnukdawk - a tawpah chuan AS Roma a zawm a, Serie A club tan hian match riatah goal sarih a khung leh der tawh.

Lukaku chuan, "Club pakhat zawm tur anga sawiin ka awm a, ka thil chhiar tawha thu awmze nei lo ber a ni hial ang. Ka chanchin engmah hrechiang lo a, ka chungchang thu lo sawi châk ve êm êm ringawt hi an awm ṭeuh ringawt mai a ni.

"Thu awmze nei lo tam tak an chhuah a, min hrechiang tak tak in awm nual. Thil chu a nih angin ka sawi mai ṭhin a, ka pehhel ve ngai lo. A hunah chuan ka la ṭawng chhuak ang. Mahse, nipui laia thil thleng tak tak kha sawi ta ila, miin mak an ti vek ang," a ti.

Kum 30 mi striker chuan sawi zawmin, "A chang chuan ka puak keh ṭep ṭhin a ni ber. Kum nga liam taah kha chuan ka puak keh hial mai thei. Mahse, tunah chuan thil awmze nei loa ngaihtuahna sen hi ka sim tawh. Tunah chuan ngawi tlat a, keimah lama ka insawrbing a ṭul lai a ni. Ka tih ṭhat ve theih football lama rilru sen mai hi a tawk a ni," a ti.

Nipui laia Al Hilal nena sawizawm Lukaku hian Saudi Arabia sawmna a hnar thu a sawi chhuak bawk. Belgian striker chuan, "Min la lut duh tih ka hriatin ka lawm hle. Mahse, indawrna kan neih hnuah ka rilru a hmin tawk lo. Khawvela league ṭha ber pawl an la ni ang tih ka ring a, mahse, Europe chhuahsan ka la inpeih lo a ni," a ti a, European top flight league la khelh rih a duh.

Lukaku hi Belgium team-ah a awm mek a, zanin dar 12:15 hian Austria nen Euro 2024 qualifier an khel dawn. Group F-ah Belgium hi awmin, match ngaah point 13 neiin hma an hruai mek a, Austria nen an point hmuh zat a inang - Kevin De Bruyne a la inhliam mek avangin Lukaku hian captain armband a hreng ang.