Upamecano chawl rih dawn

Bayern Munich defender Dayot Upamecano chu a malpui veilam hliam vangin a chawlh rih a ngai dawn a, hetih lai hian German champion tan Matthijs de Ligt leh Serge Gnabry te erawh an inkhel thei dawn hnai tawh thung.

Pathianni zana Freiburg nen an inkhelh ṭumin Upamecano hi a hliam. Euro 2024 qualifier khel tura koh ni mah se France squad aṭang pawhin a inhnukdawk a, a club lam chuan a chawlh chen tur tak erawh chiang takin an sawi thei rih lo thung.

A lan dan chuan French defender hian Mainz, Galatasaray, Darmstadt leh Saarbrücken te a hmachhawn thei dawn lo. November thla tira Borussia Dortmund nen an inkhelh hunah erawh lo kir hman tura beisei a ni thung.