Number 1 Halep a tla

French Open 2020 hmeichhe singles champion tur hriatthiam a har. Rinkai ber Simona Halep chu nimin tlai khan player langsar ni lo Iga Swiatek hneh loin last 16-ah vuak tlak a ni a, tleirawl Swiatek-i'n a vawi khat nan Grand Slam quarterfinal a lut.

Court Philippe-Chatrier a inkhelah a tir aṭangin seeded pakhatna Halep a talbuai, darkar khat leh minute riat an inkhelh chhungin a service vawi li ngawt hlohin, a khingpui service a chhuhsak ve miah lo.

Season hmasa khan last 16-ah bawk player pahnih hi an lo in tawng tawh a, Romanian star hian game khat chauh hloh chungin hnehna a chang - kuminah erawh 6-1, 6-2 in a chak lo zawkah a ṭang.

Kum 19 mi Swiatek hian a match lehpekah chuan Kiki Bertens hnehtu Martina Trevisan a hmachhawn leh ang. Nimin tlai inkhel dangah Italian player hian seeded pangana Bertens hi 6-4, 6-4 in a lo hneh ve bawk a ni.

Zirtawpni zan khan Stan Wawrinka chu third round paltlamng zo loin a tla, 2015 champion in a hneh loh hi world number 239 Hugo Gaston niin darkar thum leh minute 10 an inkhelh hnuah 2-6, 6-3, 6-3, 4-6, 6-0 in a tlawm.

Tualchhung tlangval Gaston hi a ranking a hniam avangin duhsak takin wildcard pek a ni a, duhsak tlak a nih zia pawh a lantir chiang hle - nizan khan seeded pathumna Dominic Thiem nen an inkhel a, result kan hre hman lo.

Inrinni zan inkhel dangah world number 1 leh seeded pakhatna ni bawk Novak Djokovic chuan Daniel Elahi Galan chu 6-0, 6-3, 6-2 a sawpin fourth round a lut. Serbian star hian set hmasa ber la turin minute 25 chauh a mamawh, a match hnuhnung pathumah game 15 chauh a hloh.

Kum 33 mi Djokovic hian zaninah Karen Khachanov a hmachhawn leh dawn. US Open champion Djokovic-a'n a vawi hnih nan Paris khawpuiah hlawhtlinna chan a tumna a kaltluang rih viau, final-ah Rafael Nadal nen intawng se tih chu tennis ngainatute duhthusam a ni.