Mizoram khingpui tur Services

Mizoram chuan October 15, Pathianni zing dar 8:30 hian Amritsar, Punjab-ah National Football Championship for Santosh Trophy-a an match hmasa ber an khel dawn. Lalsangzuala Hmar kaihhruai team hmachhawn tur hi tun hnai kum 10 chhunga record nei ṭha ber Services an ni.

Mizoram hian October 12, Ningani zan khan Amritsar an thleng a, nimin zing khan training an nei nghal. Pathiannia match hmasa ber an khelh hmain tukinah training an nei leh bawk ang. Group E-ah Mizoram hi Services, Sikkim, Uttarakhand, Pondicherry leh DNH & DD te nen an awm ho.

Inbuatsaihna

Mizoram Premier League vangin Mizoramin training an ṭan hma thei lo a, ni 11 chauh training-na hun a awm. Coach Sanga leh manager K. Lalenghluna (Maenga) hoin an hun neih chhung an hmang ṭha.

Ni 11 training hi 1st Bn MAP Ground, Lammual leh RG Stadium-ah te neih a ni a, ṭum li training match neih a ni bawk. Mizoram team hian Mizoram Police (8-2), FC Bethlehem (3-0, minute 60) leh Chanmari FC (5-2) te an hneh a, Aizawl FC nen 1-1 in an inhnehtawk.

Coach Sanga Hmar chuan, "Senior player leh junior player an inpawlh ṭha. Tawnhriat nei player-te hi an entawn tlak hle. Train chuanna leh hotel thlenna thlengin u nih an tlin a, team angin kan ṭhatpui hle a ni," tiin Vanglaini a hrilh.

Point a pawimawh

Mizoram hi Services hmachhawn turin an inbuatsaih a, nimin chawhma khan AIFF-in fixture thlakin match hmasa berah Dadra and Nagar Haveli and Daman and Diu an hmachhawn turin an hriattir. Nimin tlai khan fixture thar an pe leh a, Services bawk an hmachhawn ang.

Coach Sanga Hmar chuan, "Services leh DNH & DD inbuatsaihna chu a inang thei lo. Chutihrualin Amritsar a kan training hmasa ber (Nimin zing) thleng khan Services hmachhawn turin kan inbuatsaih. Fixture thlak hian min tibuai lo a, eng result pawh thleng se chhuanlam atan kan hmang lo ang, " tiin Vanglaini a hrilh.

Santosh Trophy group stage-ah team paruk an inkhel kual dawn a, pakhatna chiah an dinhmun a him nghal avangin team ṭha Services lakah point a pawimawh dawn. Chutihrualin Mizoram coach Sanga'n chak tuma an khelh tur thu a sawi.

Tlarhma hi

Mizoram striker Lalkhawpuimawia (Mapuia) hian MPL10-ah goal thum a khung tawh a, Mapuia thlawp theitu tur Vanlalthanga (3), leh Laltlanzova (2) te goal neihzat belhkhawm chu goal nga a ni.

Tlarhmaa awm thei dang PC Lallawmkima, Lalliansanga leh Lalthangliana (AB-a) ten MPL10-ah goal an la khung lo. AB-a erawh MPL10 hmahruai mektu Chanmari FC game siamtu ber a ni. Mizoram team-ah hian no. 10 hna hun rei tak chelh tawh R. Malsawmtluanga a awm a; MS-a, AB-a bakah Crespo Vanlalhriatpuia leh Thanga te pawh no. 10-a chhawr theih an ni.

Chutihrualin PC-a leh LS-a te goal khung loh chhan hi transfer tih tlai vanga match hnih chauh an khelh vangah a ngaih theih. PC-a hi Army team lama sulhnu nei ṭha a ni a, LS-a season liam ta Chawnpui FC champion puitu kha a ni thung. Mizoram tan Services champion pui tawhtu Samthang tlangval PC-a tawnhriat hi a pawimawh ang.

Tlarhnung ve thung

Mizoram captain Lalrinchhana Tochhawng hi centre back a ni a, tun ṭum hi Mizoram tan Santosh Trophy-ah vawi kua a kalna a ni ta. Nikum lama nupui neih vanga kal thei lo Lalhmunmawia (Ahmuntea) a inlan leh thei tawh a, right back Lalrinzuala chauh hi 2014 champion team zinga mi a ni tawh.

Tlarhnunga awm thei zingah Lalmawizuala'n tawnhriat a nei ṭha a, defender dang A. Vanalremruata, Laltluangliana, Ephraim Lalremtluanga leh FC Lalhmunmawia te erawh an vawi khat kalna a ni.

Tlarhnung pui turin Lalbiakthanga Hmar, Johny Lalrinchhana leh Zonunmawia te an awm a, an len loh avangin team anga an ṭan thiam a pawimawh dawn. Goalkeeper-ah Lalmuanawma leh RS Lallawmzuala te an awm bawk.

Services hi...

Services hi vawi ruk champion tawh an ni a, inelna hnugnung 10-ah vawi nga an champion. Inelna hnuhnung berah pawh semifinal an lut a, Saudi Arabia-a zin pha zinga mi an ni.

Services-ah hian Mizoram champion chhuna defender Zothanpuia (Thangpuia) a tel a, ani hi tlarhnungah defender pawimawh a ni tura ngaih a ni. Tlarhma lamah final-a chakna goal lo khung tawhtu Bikash Thapa chu an inngaihna tura ngaih a ni a, midfield-ah tawnhriat nei ṭha Christopher Kamei-a'n a lai lum a luah ang.

Kumin Durand Cup-ah Army Red Team an tel a, Santosh Trophy ṭan hmain Inter Services an nei leh tawh. Services player-te fitness a ṭha dawn a, Mizoram nena an inkhel tur hi group E inkhel tur zinga pawimawh ber ang hialah a ngaih theih a ni.