Chak vek awmchhun Argentina

Qatar World Cup champion an nih hnuah Argentina chuan World Cup 2016 atan qualifier an khel chhunzawm leh nghal tawh a, qualifying match vawi thum an khelh tawh chinah an la chak fai vek.

Argentina hian nimin zing khan Nicolas Otamendi-a goal khat hmangin an mikhual Paraguay chu 1-0 in an hneh. South American ram 10 zingah La Albiceleste chauh hi chak kim thei awmchhun an ni.

World champion hian minute 662 chhung chu a zawnin goal an chhuah ta lo, goalkeeper Emiliano Martinez-a'n ram tan a zawna goal chhuah lo rei record a siam a, ani bakah hian tlarhnunga ding ten an hna an hlen ṭhat vang a ni bawk.

100% chak

Lionel Scaloni enkawl Argentina boruak fuh a kal zel a, khelmual chhungah chauh pawh ni loin khelmual pawnah pawh an inkawm ngeih hle, chumiin a ken tel chu result ṭha a ni - dan theih loh ang maiin an kal tluang mek.

River Plate Stadium-a inkhelah, minute thumna lekah Otamendi chuan Rodrigo de Paul-a corner pet chu a lo hlap lut a, point thum hlawhchhuah nan a tawk. Bench aṭanga lut Lionel Messi-a'n khung belh theihna remchang nei mah se a goal ta lo.

Hliam damkawr Messi hian bench lamah hun a hmang hmasa, minute 53-naah Messi hian Julian Alvarez a thlak. Khelmual a luh dawnah Otamendi chuan tih dan phung pangngaiin Messi hi captain armband a lo pe - Messi hian hnar mah se a pe lui ta tho.

Inter Miami forward Messi hian corner aṭangin goal bar a pet per a, freekick aṭangin goal ban a per per bawk - a vanneih ṭum ni se la chuan goal mawi a khung ngei ang, mahse ram tana goal 104 a neihsa chu a belh thei rih lo a ni.

Brazil an chelh

World champion vawi nga ni tawh Brazil pawhin a zawna a vawi thum nan chak an beisei hman, mahse defender Gabriel goal khung chu Venezuela tan Eduard Bello chuan hun tawp dawnah sutin, ram pahnih hi 1-1 in an inhnehtawk.

Tite chhuah hnuah coach lailawk Fernando Diniz hoin Brazil hian result an nei ṭha viau - forward Neymar pawhin Pele khumin ram tana goal khung hnem ber a ni tawh, ani hian goal khung belh chiah lo mah se Gabriel khung tur hi a siamsak a ni.

Inkhel dangah Uruguay tan Liverpool forward Darwin Nunez chuan hun tawp dawnah goal khungin, an mikhualna ramah Colombia nen 2-2 in an inhnehtawk. Uruguay hian match thum aṭanga point li hmuin palinaah an awm.

South American ram 10 te hi vawi hnih ṭheuh an inkhel kual vek dawn, chumi hnuah a sang zual panga an tling nghal ang - parukna chuan playoff an khelh a ngai dawn. Ram awmzat aṭanga chhutin World Cup khel thei an tam hle.