Nagelsmann-a'n hna a ṭan dawn

Germany national team chuan coach thar Julian Nagelsmann hnuaiah zanin hian bul an ṭan dawn. Rentschler Field, Connecticut-ah Germany hian United States an hmachhawn dawn a; October 18, Nilaini zingah Mexico an hmachhawn leh ang.

Germany hian Euro 2024 an thlen dawn avangin qualifier an khelh ve a ṭul lo. International break-ah friendly match an khel thung a, chutihrualin US-ah daih an inkhel erawh Bayern Munich manager Thomas Tuchel a thinur hle.

Bavarians boss Tuchel chuan, "Kei ni ta ila, US-a Mexico hmachhawn hi ka duhin ka ring lo. Thutlukna hi mak ka ti a, siam ṭhat theih a ni tawh lo. US hi a hla a ni ringawt lo a, time zone hran a ni," tiin a lungawi loh thu a sawi. Bayern hian October 21, Inrinniah match an nei lehnghal dawn a, Tuchel-a lungawi loh chhan a hriatthiam theih.

Chutihrualin Germany pawhin thil ṭha ber an duh a, tun hnai inelna liana an chet ṭhat loh avangin tun ṭuma friendly pawh hi an ngai pawimawh dawn. Nagelsmann-a'n hun tam a nei tawh lo a, tun hi player enchhin nan a hmang ang.

Ram tana la khel lo Kevin Behrens, Chris Fuhrich leh Robert Andrich te chu an club khelhna Union Berlin, VfB Stuttgart leh Bayer Leverkusen tana an khelh ṭhat avangin koh an ni. Borussia Dormund defender Mats Hummels pawh kum hnih a awl hnuah an ko a, an ram ngeia Euro C'ship khelh tum tan tun hun hi hman ṭhat a ṭul dawn a ni.