Ducati pan tur Marquez

Marc Marquez chuan season thar aṭangin Ducati bike a khalh dawn, season kal mekah Repsol Honda tan la tlan mah se kum thara a awmna tur a tichiang der tawh a ni.

Spanish rider hian Honda bike khalh chungin MotoGP title paruk ngawt a la thei a, tun hnai season thum chhung erawh hliam vangin a buai hle. A chetsualna avangin a ban ruh tliak zai a ni a, tun hnaiah erawh dam pangngai takin inelna a hmachhawn thei leh tawh.

Marquez hian Honda tan season li daih contract a neih chu a hmang mek a, an inrem dan chuan season khat dang a la nei. Mahse, rider leh a team lamin inremsiamnain contract hi an titawp a, chona thar a hmachhawn dawn ta zawk a ni.

Tun season kal laiah erawh Marquez hian champion beseina a nei tawh lo a, nomawi chawi beiseina nei tawh lo mah se season thar inbuatsaihna a nih nghal avangin a ṭha thei ang bera kum tawp khar a duh ngei ang.

Pathianni chawhnu dar 12:30 hian Mandalika International Street Circuit-ah Indonesian Grand Prix an tlan leh ang.