Hey Jude - Lal thar a piang ta?

'Football Lalpa' tiin Pele chanchin an sawi ṭhin a, 'The Golden Boy' tih ngata an koh Diego Maradona kha rual u deuhte chuan ani aia thiam an la hre thei lo - player pahnih inkarah hian tu nge ṭha zawk? tih chu vawiin thlengin inhnialna a la ni reng.

Pele-a ram Brazil leh Maradona inpui Argentina ten footballer ṭha tak tak an chher chhuak reng a, rang takin 'The Next Pele' leh 'The Next Maradona' hming lem pek an ni ṭhin a, mahse, khawvelin a beisei a hmu ngai lo.

Player ropui pahnih hnuah Brazilian striker thiam bik Ronaldo, French legend Zinedine Zidane, mawi taka football par tirtu Ronaldinho, AC Milan legend Kaka te ho khan thawm an nei leh hat a, mahse, Pele leh Maradona boruak chhim phak an awm lo.

Chutiang boruak karah chuan inrual angreng takin Lionel Messi leh Cristiano Ronaldo an lo lang zawk a, anni meuh hi chuan Pele leh Maradona boruak an tem phak a ni mai lo a, a tam zawk chuan, "An khum alawm" tiin an sawi hial ang.

Mahse...

Khawvel a ni miau a, awm hlen tur emaw kan tihte pawhin chuai lam an pan fo a, Ronaldo leh Messi meuh pawhin khelmual chhunga an hun tawp lam an hmang ṭan ta - Ronaldo chuan Al Nassr tana khelin Saudi Pro League a mawi mek a, tun hma a pha tawh lo tih zep tur a awm lo.

Messi meuh pawhin hahdam taka inkhelh a duh tawh a, kum 36 mi a nih tawh avangin khawvel pawhin, "A awm alawm" an tihsak a, inelna hautak lo zawka khel turin MLS club Inter Miami tan a khel tawh - hnah hlui an ṭil ṭan a, a thlaktu tur hnah thar an awm dawn em, tiin khawvelin a thlir a nih hi.

Neymar kha Messi leh Ronaldo te kianga leng ve tur niin khawvelin a ngai a, mahse, a taimaknain a tlin ngang lo. Erling Haaland leh Kylian Mbappe an lo lang a, thiam teh mah se Messi leh Ronaldo huhang an la phak lohziaah zep tur a awm lo.

Chuti chung chung chuan player pahnih hi Messi leh Ronaldo hnung zui thei ber tura ngaih an ni a, mahse, chutah tak chuan ani mi pakhat a lo lan tak - chumi hming chu Jude Bellingham a ni a, khawvelin football mawina belhchhah turin an beisei a ni.

Lal thar chu...

Kum 17 mi lek nia Birmingham chhuahsan a, Borussia Dortmund a zawm khan khawvel chuan Bellingham-a 'special' zia a hre daih tawh. Mahse, hetiang taka thiam a ni ang, tih erawh rin thiam a harsa a, top flight league a la khelh loh miau avangin a awm lo hran lo.

Mahse, Bellingham chher hriam a, naupang a nih lai aṭanga tuai hnumtu Birmingham lam hian an player theihna sanzia hi an hai lo. A number hak ṭhin '22' chu player dangin an hak ve tawh ngai lo turin an dah ṭha a, mi tam takin, "Lutuk" tiin an sel.

Chutiang boruak karah chuan Bellingham-a'n khelmualah amah ringhleltute chhanlet hna a thawk a, kum 17 mi lek ni siin Germany leilungah a tlangnel nghal êm êm a, a season thumnaah phei chuan Bundesliga Player of the Season atan thlan a ni hial.

Khawvelin Bellingham a hmuh hmaih lo. European club liante chil a tiput a, a tirah Liverpool nen sawizawm ni mah se pound maktaduai 100 chuang man a nih dawn avangin Reds an inhnukdawk - mahse, football club-in player pakhat mana pound maktaduai 100 a seng dawn a nih chuan ani lo liama senna tur tu nge awm chuang?

Madrid mawitu

Liverpool sum neih loh laiin Real erawhin an neih ang ang sen an huam a, euro maktaduai 103 nen Borussia Dortmund kawngkhar an kik - German club hian an tan Bellingham chelh reng a rem lo tih an hai lo.

Euro maktaduai 103 chu Dortmund hnenah an pe phawt a, Bellingham khelh ṭhat dan a zira €133.9mtd-a sang chho turin an ti. Real hian pheichham an man a ni ber a, Bellingham-a man pek belh tur la awm hi phur takin an pek belh zel ang tih a chiang - a tlangnel nghal tlat.

Kum 20 mi, a nihna takah chuan, nu leh pa thlazar hnuaia la awm rual lek hian Madrid khawpuiah insiamrem turin hun a mamawh lo a, 'nghah hret' a ngai ve lo! Real tan match 10 a khelh tawhah goal 10 a khung der a, assist vawi thum a nei bawk.

Bellingham chuan, "Ka inringtawk a, mahse, hetiang êm êm hi chu ka beisei lo," tiin Real-a a bul ṭan dan a sawi a, a demawm lo. Khawvelin mak tiin a thlir a, 'Hey Jude' tiin a hming an infaksiak mek.

Maradona maw?

Bellingham-a'n Real tana a match hnuhnung berah goal hnih a khung a, Osasuna chu 4-0 in an sawp. La Liga match hma chiah hian Champions League-ah a inlan a, Real Madrid-in 3-2 in Napoli an hneh a, hetah pawh hian goal mawi bik a khung.

Hei ngei hian Italian ho lung a tileng a, Naples khawpui chuan an pathian ang maia an en, eng dang zawng aia an ngaihhlut Maradona kha - a tho leh ta em ni? an ti hial a, rinhlelhna nen an mit an nuai hial a nih kha!

Spanish media an phur fal a, El Pais chanchinbu chuan, "Maradona run chhung ngeiah Bellingham chuan thiamna sang ber a pho chhuak a ni," a ti a, "Naples khawpui - football pathian zinga ropui ber tual len ṭhinna ngeiah khan, pa pakhatin a huan nuam tak awlsam taka a fang kual ang mai hian a leu vel a ni," a ti bawk.

Mahse, Bellingham erawhin chu fakna chu sang a ti lutuk. Jude chuan, "An ti nasa mah mah a ni. Goal nalh tak a ni ve mai. YouTube aṭangin Maradona inkhel ka nen a, kei aiin a thiam zawk fe a ni. Ka nihna anga khelhchhuah mai hi kei chuan ka tum," a ti a, a inphah hniam thiam hle.

Tu nge chhing zo?

Spanish chanchinbu lar Marca chuan, "Di Stefano tlem leh Zidane tlem chawhpawlh ang mai a ni," a ti a, a la duhtawk mai lo a, a aia sang maha fakna ṭawngkam hui khawmin, "Maradona ang a ni e," tiin Bellingham an fak!

Spanish football expert Guillem Balague chuan, "Tun dinhmunah ani aia ṭha zawk khawvelah an awm lo!" a ti tawl mai - Haaland leh Mbappe te khan in lo ngaithla maw?

Balague chuan sawi zawmin, "La Liga-a a sang ber zinga awm hi a duhthusam a ni a, chutah chuan a hming hian nemkai a phu ve tawk niin a hre bawk. Spain-ah chuan player ropui tak tak nen an khaikhin a, a tirah Zidane an ti a, tunah chuan Di Stefano an ti leh tawh.

"Mi zawng zawng, footballer chenin footballer ṭha tak a nihzia hi hahipin an sawi a ni," a ti - a awih lo tan instagram lama Bellingham-a thlalak tarlana a footballer puite fakna chu en theih a ni!

Fakna a dai lo

Spanish infiamna chanchinbu lar AS-a ziaktu Alfredo Relano chuan, "Di Stefano kha min ti hre chhuak a ni - a ball keng leh tlanpui vel chu hmuh a hahdamin a che vel chuan mit a titlai takzet a, ball chuh let tura a beih dan lah a huaisenin a thawkrim êm êm bawk.

"Artist a ni a, mi huaisen a ni tel bawk," a ti a, a la duhtawk mai lo. Napoli laka a goal khung chungchang sawi chhuak zuiin, "Chemte hriam taka awlsam taka butter kan zai ang mai hian Napoli tlarhnung kha a paltlang a ni," a ti zui.

Real tana a kawppui fuh êm êm mai Vinicius chuan, "Jude hi Real Madrid-a lo khel turin ka duh êm êm reng ṭhin. Nikum khan Bellingham hi message tam tak ka thawn a, ni tina biain, 'Madrid-ah lo kal rawh,' ka ti reng mai a ni," a ti!

Madrid manager Carlo Ancelotti chuan, "Kum 20 chauh a ni hi mak ka ti zawk. A puitlinzia leh a rilru puthmang hi en ila, kum 30 tling tawh ang mai a ni," a ti - Bellingham-a'n football khawvelah ro a rel mek e.