Silly Point: Kar tawpah National Holiday

ICC Cricket World Cup 2023 kal mek zelah inkhel hmuhnawm tak tak ni tin mai kan hmu zel. Champion ngun ber Australia-in point an la hlawh chhuak lo a, semifinal invawkai thei lo dinhmunah an ding reng ta mai.

Nomawi chawi thiam Australia an talbuai lai hian nomawi chawi harsat South Africa leh New Zealand te erawhin mit an la la fu hrih a. Inelna thlengtu India leh Pakistan te phei chu mit la bik an ni.

Indo-Pak

ICC Cricket World Cup fixture an chhuah phat khan, cricket tui mite leh infiamna khawvel mit fukna chat chu vawiin tlai Ahmedabad khuaa, India leh Pakistan intum hun hi a ni.

Cricket khawvela India leh Pakistan inchaltauh hun a thlen tawh hi chuan, infiamna mai a ni tawh lo - Politics, Economics, Sociology, Geography etc a huam tel nghal vek.

Bollywood leh Sandalwood smuggler thlengin a nghawng a, kan duh emaw duh lo emaw mi chitin telna 'Mela' pakhat hi a ni ber mai awm e. An intawhna hmun World Cup a nih lek phei chuan a pui lo thei lo.

A behbawm

Ahmedabad lama hotel thlenna man a let tamtaka a pun tak hluai avangin, Pakistan fans ticket nei tam tak chuan Ahmedabad khua leh a chhehvela zan hnih khat lek riaka check up neih paha man tlawm zawka damdawi in hrang hranga in admit mai chu a fin thlak zawk tih an hria.

Health Department thlengin a nghawng zo tawh a ni ber. Official Broadcaster Disney Star lamin vawiin inkhel bik atan Company, dawr leh brand infak duhte chu a let 2/3 a rate sanin, ṭum khat second 10 inlan zelah cheng nuai 60-in a man an san a, chupawh phung zinga piring vawrh ang mai a ni.

US president hlui Donand Trump leh kumin kum tira Australia PM Anthony Albanese te lo thleng tawhtu, mipui 1,34,000 len theihna Narendra Modi Stadium , Ahmedabad a mi chu zanin tlai Cricket khawvel Lirnghing Epicenter a ni dawn chiang.

India-Pakistan inkhel tur a lo ni kher kher nen, sorkar laipui lam pawn Ahmedabad khaw pumpui chu "no drone zone" a puangin, he cricket stadium leh a chhehvelah hian Security mi 11,000 vel an phusa dawn a ni.

Silai tel lo indona

India leh Pakistan inkhel hi chu 'Silai tel loa indona' tia hming phuah a lo ni ṭhin a. World Cup Record enin India hi 7-0 a ni ngei a. Tun ṭumah pawh hian Rohit Sharma leh a hote hi rin kai leh buk rit zawk chu an ni nameuh mai.

Delhi lam an pan dawn a, Chennai lama dengue vei, inenkawl dam tura an hnutchhiah star opener Shubman Gill chu, a ṭhianten Afghanistan an tum lai Nilaini khan Ahmedabad a thlawk thleng tawh. Vawi tlai inkhelah hian inlan thei tak maw?

Thla hmasa lawk September 10-a, Sri Lanka-a Asia Cup-a an intum ṭuma 228 runs teh meuha dawl zawra an zawrna hliam kha Pakistan player-te rilru ah hian a la dam dawn hauh lo. Tun hnai kum hnih khat chhunga beisei pha zo zan lo, Pakistan team hi tun World Cup lama ṭum hnih an inlan tawh chinah erawh mit an la fu.

Bowling department nei ṭha Pakistan team hian India an barakhaih dawn a nih ngai chuan, hun engmawchen a form pangngaiin a kalsan, an kaptan Babar Azam a ṭhanharh thut erawh a ngai dawn a ni. Chin hriat a ni lo - player ropuite danglamna a ni tlat ṭhin a, Silly Point hlui lamah pawh Virat Kohli kan lo kaihharh tawh kha maw!

India bik

Pitch inang lo tak pahniha fiahna paltlang tawh Rohit Sharma leh a hote hian an chakna combination hi an siksawi vak a rinawm lem loh. Amaherawhchu, Shubman Gill-a hriselna leh Ahmedabad pitch awmdan tur a zirin Shardul Thakur leh Ravichandran Ashwin a te inkara a tu zawk nge lut ang, tih a nih mai hmel.

Hardik Pandya hi pacer 3-na leh 5th bowler role a pek theiha an ngaih chuan batting line up tithui turin Surya Kumar Yadav a lut a nih pawn thil mak a ni kher lo ang. Tun dinhmun han thlir chuan India aiin Pakistan team lam hi an mut a tui lo zawk ngei tura ngaih chu an ni e.

Vawin tlaiah aw

Infiamna khawvel nghahlelh mai bakah he inkhel hian India leh Pakistan indaidanna nghawng a nei nual a, chumi zinga mi chu Pakistan player Hasan Ali a puzawn India mi, Faridabad khuaa khawsa Liyakat Khan a ni.

Kum hnih liam ta khan an fanuin an tu hmuh hmasak ber tur a hrin dawn avangin, a nupui chuan Pakistan a pan a, India leh Pakistan hi duh duh huna intlawhpawh a har avangin a la cham ta reng.

Tun ṭumah hian a nupui lo let leh thei tur mai bakah, a makpa Hasan Ali te inkhel rawn ṭawiawmin a fanu leh tu neih hmasak ber hmel a live-a an hmu ve thei tur lawm avangin a biangah mittui a luang hial. Cricket zawng Hamara Desh leh a chhehvelah hian engkim mai hi a lo nghawng vek a ni e.