Spain hmaah Scotland an tlawm

Euro 2024 qualifier khelh meka a vawi khat nan Scotland an tlawm a, Euro inpetkai tura vawi khat chak chiah mamawh tawh team hian khualmualah Spain chu 2-0 in an ngam lo - La Roja tan Alvaro Morata leh Oihan Sancet te chuan goal khat ve ve an khung a, Scottish team-in a chhanletna tur an nei lo.

Scotland hian tlawm mah se group A-ah hma an hruai chhunzawm a, pahnihna Spain ai hian point thumin an la sang. Match khatin an khel tam thung a, an dinhmun erawh derthawng ta viau anga sawi a rem lo.

Group A inkhel dangah Norway-in 4-0 in Cyprus an sawp a, Erling Haaland chuan goal hnih khungin, Alexander Sorloth leh Fredrik Aursnes ten goal khat ve ve an khung bawk - beiseina an la nei ve zel.

Spain an thiam

Inkhel ṭantir aṭangin Spain-in an nawr nghal a, minute thumna leka Morata siamsak mawi zet chu Ferran Torres chuan uiawm takin goal-ah a chantir thei lo. Mikel Merino pawhin a chance neih post pet per nana a hman kha ui takin a thlirlet fo ang.

Euro qualifier-a khel ṭha tak, tun hnai lawka Manchester United chhandamtu Scott McTominay chuan freekick hmangin mawi zetin goal hmahruai a khungah a inngai a, mahse, video assistant referee hmanga ennawn a nih hnuah pawm a ni lo.

Scottish centre back Jack Hendry a lo offside a, McTominay goal khung chu uiawm takin pawm a ni ta lo a ni.

Morata bawk

Atletico Madrid striker Morata-a'n season duhawm tak a hmang mek a, ram tan pawh a season hman ṭhat a chhunzawm zel - minute 73-naah Jesus Navas siamsak chu goal-ah a chantir a, Spain captain hian kuminah ram tan match ruk khelin goal li a khung tawh!

Morata goal khung tur siamsaktu Navas kha Manchester City-a kan hmelhriat ṭhin Navas kha a la ni reng - kum 37 mi ni tawh mah se, ram tan a la inlan reng a, Sevilla defender hi Spain coach Luis de la Fuente-a'n a la duh hle.

Spain hian an duhtawk mai lo. Hun tawp nan minute li chiah a awm tawh tihah Scotland fullback Aaron Hickey a tawlhthlu a, heta ṭanga ball kal zel chu Ryan Porteous chuan an lamah a tlawh lut palh - he goal luhna tura Porteous tibuaitu Sancet khung angin official-ah chuan record a ni thung.

Andy Robertson a inhliam

Scotland captain Andrew Robertson chuan a darah hliam a tuar a, Liverpool fullback hi khel chhunzawm thei loin, minute 44-naah lakchhuah a ni - Reds manager Jurgen Klopp-a tan chanchin hriat nuam a ni lo ang.

Scottish team coach Steve Clarke chuan, "Uluk takin kan en ang a, a club lamah a kir leh ang. Position pakhata player kan hloh hian, a dang pawh kan chân zel ni ber hian ka hre tawh.

"Kieran Tierney kan chhawr thei lo a, tunah Andy a inhliam ve leh ta. Engtiangin nge a awm zel dawn kan thlir reng ang a, a club tana khel leh thuaiin, November international break-ah chuan kan hnenah a awm leh theih tawh hram ka beisei," a ti.

Scotland hian Spain lakah point khat lek pawh hlawh chhuak se, Euro 2024 khel tura tling thei an ni. Mahse, an tlawm a, an nghah leh rih phawt a ngai dawn.

October 15, Pathianni zan dar 12:15-ah Spain hian Norway an lenchilh leh dawn a, Norway-in hnehna an chang lo a nih chuan Scotland hi Euro 2024 khel turin an tling tho ang.

Scotland erawh October 17, Thawhlehni zan dar 12:30-ah France nen friendly match an khel dawn a, tun international break-ah chuan qualifier match an khel tawh lo ang.