Nadal a chak awlsam

Nimin tlai khan Simona Halep tlakna hmun Court Philippe-Chatrier-ah Rafael Nadal a inlan chhunzawm a, mipa champion lai hian Sebastian Korda hneh turin harsatna a tawk lo - darkar khat leh minute 55 chhungin 6-1, 6-1, 6-2 in a hneh a, quarterfinal a lut.

Spanish star Nadal-a'n kumin French Open-ah hian set a la hloh miah lo, nuamsa taka hnehna a chan zel theih avangin tha a la khek thei viau tihna a ni - major tournament-ah chuan match hmasa lama inkhelh rei loh hi a hnu lamah a ṭangkai ṭhin.

American player Korda-a'n kawng engkimah Nadal a phak lo a, break point vawi khat hmu ve bawk mah se ṭum khat chauh a chhuhsak thei. Champion lai zawkin a khingpui service vawi riat a chhuhsak, unforced error vawi 20 a neih erawh insiamṭhat hret a mamawhna lai a ni.

Seeded pahnihna Nadal hian a vawi 13 nan Paris khawpuiah nomawi chawi a tum mek a, a hlawhtling thei a nih chuan Grand Slam title la hnem ber Roger Federer (20 titles) a nihrual thei dawn tihna a ni.