Man United-in Cavani an la dawn

Manchester United chuan Paris St-Germain striker hlui Edinson Cavani an lalut hnai. English club hian tun nipui transfer-ah Donny Van de Beek chiah an la lalut. Kum 33 mi Cavani hi June thla tawp khan PSG-a a contract neihlai a tawp a, a pawtsei tawh lo. 

Uruguayan striker hian club a neih loh avangin a thlawna lakluh theih a ni a. Benfica leh Atletico Madrid pawhin nipui transfer ṭantirh khan Cavani hi an dawr a, amaherawhchu agent fee-ah euro maktaduai 10 pek a ṭul avangin inbiakna a hlawhtling lo.

Nipui transfer-a che chhia Manchester United erawhin an duh ber Jadon Sancho lakluh an harsat a, anmahni ṭantute aṭanga sawiselna an tawk nasa. English club hian July thlaa lakluh theih tawh Cavani hi transfer tawp dawn hnaihah an bawhzui chauh a, 'mangan lak' tia sawi theih dan a awm.

Chutihrualin Cavani hian PSG tan goal 200 a khung a, club record goal scorer a nih bakah league nomawi vawi ruk zet a lakpui. Uruguay tan pawh Cavani hian match 116 aṭangin goal 50 a khung a, world class striker a nih miau avangin Man United mamawh tak a tih theih bawk.

Manchester United hian Alexis Sanchez an lakluh ṭumin kar khatah £350,000 an hlawhtir a, an tisual chiang hle. Chilean forward aṭang hian inzirin Cavani hlawh erawh kar khatah £200,000 vel tura ngaih a ni a, United nen inremna an nei tawh.

United official ṭhen-khat chuan kum 2016 a an lakluh kum 34 mi  Zlatan Ibrahimovic ang thoin club-ah nghawng ṭha a neih an beisei a, a tawnhriat ṭha tak hi forward naupang zawk Anthony Martial, Marcus Rashford leh Mason Greenwood tan inzirna tur a awmah an ngai bawk.

Cavani hian nimin khan medical nei turin Manchester a thleng tura ngaih a ni a, medical a patlang a, inremna an nei thei a nih chuan Ole Gunnar Solskjaer-a'n tlarhmaah striker ṭha chhawr tur a nei dawn tihna a ni ang. English club hian October 20, Thawhlehni zanah PSG an tlawh dawn a, Cavani hian a club hlui hmachhawn theihna hun ṭha a nei thei ang.