Mizoramin Services an hneh lo
National Football Championship for Santosh Trophy-ah Mizoramin bul an ṭan ṭha lo a, nimin khan Amritsar, Punjab-ah match hmasa ber khelin Services lakah 2-1 in an chak lo. Mizoram hi chak lo mah se final round luh theihna kawng a la inhawng.
Guru Nanak Dev University ground-a inkhelah Services-in Samir Murmu hmanga an khung chu Mizoramin Lalkhawpuimawia goal hmangin an sut. Lalsangzuala Hmar hote an insiamrem chhoh lai takin tlarhnung chesualah Services tan Bikash Thapa-a'n chakna goal a khung
Services an chungnung
Inkhelhna hmun GNDU ground hi phai tual hnim a ni a, Inrinni zanah ruah a sur bawk avangin ground a nal. Artificial turf-a khel ṭhin Mizo player-ten khelh an harsat a, Services an chungnung nghal.
Services lamin ball an inpe kual ṭha a, Mizoram lamin halfway line an pel thei meuh lo. Services tana khel Mizo tlangval Zothanpuia (Thangpuia) leh a ṭhianten ball kang an chang thei a, Mizoram player erawh ground nalah an laklawh chiah chiah zel.
Dinglam kil aṭanga Services winger Bidhyasagar a ball vawrh luh chuan goal ban a per a, Mizoram an him. Services hian chance ṭha bik insiam thei lo mah se box pawn aṭanga Boinao Singh-a pet chu keeper Muanawma'n a dang ṭha hle. Muanawma hian Christopher Kamei-a corner pet ṭha chu a hnek chhuak bawk.
Mizoram an talbuai rei avangin first half-ah substitution siam a ni a, Lalmawizuala leh Vanlalthanga te an lut. First half-ah Mizoram an ṭang tluan dawna a lan laiin ding lama cross chu Samir Murmu-a'n injury time-ah a tauh goal.
Mizoram ṭha zawk
Halftime-ah coach Lalsangzuala'n player-te a fuih ṭha a, Mizoram an insiamrem hret. Ground a ro ṭan tawh bawk nen Mizo tlangvalten ball an inpe dik thei ṭan a, an khel a kang hret.
Bench aṭanga lut Lalthangliana'n (AB-a) inkhel a tinung. Chutihrualin Services khel a la nung reng a, tawnhriat nei ṭha Mawizuala tlarhnungah a ṭangkai hle.
Mizoram hun a inher chhuak a, Thanga'n Services defender a bum hnuah a ball pek chu Mapuia'n vawi khatah kawh zetin minute 73-naah a khung. Inkhel a nung sawt a, Mizoram an inringtawk ta bawk.
Mizoramin goal dang neih belh an tum a, nawr an tum luatah defender an chesual. Captain Rinchhana ball pet chhuah turah Bikash Thapa a inrawlh hman a, Services striker hian minute 79-naah chakna goal a khung.
Services-in tawnhriat an neih ṭhat avangin pressure sangah an buai lo a, hun an khawhral thiam bawk avangin substitute PC Lallawmkima pawhin a team hlui a tibuai pha lo. Chutihrualin hun tawp hma hreta Lalbiakthanga ball pet erawh a goal teuh a, goal pawn chiaha a kal avangin Mizoramin point an hlawh chhuak ta lo.
Eng nge an sawi?
Mizoram coach Lalsangzuala Hmar chuan, "Chhuanlam siam ka tum lo, kan khel ṭha lo zawk. Services khan chak an phu zawk a, an chak. Thil tam tak ka hriat belh a, insiam ṭhat nan kan hmang ang," tiin Vanglaini a hrilh.
Sanga chuan sawi chhunzawmin, "Kan beisei angin khel lo mah ila ka naute an thawkrim tih ka hai lo. Kan thawhrim rah hi thlawn mai atan ka phal lo a, kan tho chhuak êm êm ang," tiin final round an luh ngei a inbeisei thu a sawi.