Mizoram beiseina chu

Santosh Trophy-ah Mizoramin an group-a team ṭha bera ngaih Services an hmachhawn a, 2-1 in an tlawm. Services hi an khelh hmabakah an chak vek a nih chuan group E-ah pakhatna an ni dawn a, Mizoram tih theih sang ber chu pahnihna a ni tawh dawn tihna a ni.

Tun ṭum inelnaah hian nikum finalist Karnataka leh Meghalaya te chu final round lut sa an ni a, Arunachal Pradesh pawhin final round an thlen dawn avangin team 12 zingah an tel ta bawk.

Hmun ruak pakua zinga paruk hi group winner an ni dawn a, group paruk aṭanga pahnihna tiṭha pathumin final round an lut leh bawk ang. Mizoram hi pahnihna tiṭha pathum zinga tel turin an kutah engkim a la awm.

Nimin khan Mizoram group-a awm Pondicherry leh Dadra & Nagar Haveli and Daman & Diu te 1-1 in an inhnehtawk. Match hnuhnung berah Uttarakhand-in Sikkim 1-0 in an hneh a, Jatin Singh kaihhruai Uttarakhand hi AIFF-in seeded pahnihnaah a dah a, group E-ah pahnihna an ni.

Mizoram coach Lalsangzuala Hmar chuan, "Beiseina sang tak kan la nei a, group dang dinhmun thlirin kan chak vek theih chuan kan tling ngei dawn niin a lang. Kan group-a inkhel dang pahnih pawh kan a hmunah kan en a, kan chak vek thei lo a nih chuan final round khel tlak kan ni lo ang," tiin Vanglaini a hrilh.