India-in Pakistan an nau en!

Cricket World Cup-ah Pakistan-in India an la chung en zel - Inrinni zan khan wicket sarih ngawtin India hian Pakistan chu an sawp a, mipui tluklehdingawn chuang awmna India chu lawmin a lam leh ta.

Inrinni zan khan World Cup-a a vawi riat nan India leh Pakistan an intawng a, a vawi riat nan India an chak. Ahmedabad khawpuia inkhelah India an vannei hmasa a, ṭhum vawrah dingchangin, vawm hmasak an thlang.

Khawvela cricket stadium lian ber, mipui 132,000 lenna Narendra Modi Stadium-ah mipui an khat vek a, online-a inkhel enna Disney+ Hotstar-ah ringawt pawh mi maktaduai 35-in he inkhel hi an en!

Inkhel boruak sangah Pakistan tan Abdullah Shafique (20 runs) leh Imam ul-Haq (36) ten duhthusamin bul an ṭan ṭha tawk lo a, mahse, captain Babar Azam chuan a naute tan entawn tur hnutchhiahin a rawn ti ṭha pangngai viau - ball 58-ah run 50 a siam.

Mohammad Rizwan chuan Babar Azam hi ṭha taka puiin run 49 a rawn siam a, mahse, batter pahnih an 'out' hnuah Pakistan hian ngai an awh tawh lo - over 42.5-ah run 191 siamin, an vaiin an out vek a, Idnian bowler-te an ngam lo.

Mahni khelmualah India ran tan run 192 siam chu thil huphurhawm niin a lang lo a, Afghanistan laka century siam zo hlim, Men in Blue captain Rohit Sharma a rawn tal ngap nghal hle - World Cup 2019-a Pakistan laka run 140 zet vaw chhuaktu hi 2023-ah pawh Pakistan tan mangchhia a la ni reng.

Kum 36 mi Rohit Sharma hian ball 63-ah run 86 ngawt a rawn vaw chhuak a, Pakistan bowler-te a chhaih mangang - hetihlai hian India beiseina Shubman Gill leh Virat Kohli erawh run 16 ve ve chiah siamin an 'out' a, hetihlai pawh hian Rohit Sharma erawh a ding nghet tlat.

Shreyas Iyer hming lam hmaih a thiang lo - kum 28 mi batter hian run 53 siamin, Rohit Sharma chhuah hnuah pawh India beiseina a chhi nung a, run 19 siamtu KL Rahul nen a tawp thleng damin India an chakpui.

Men in Blue hian over 30.3-ah target um pha derin, wicket thum chiah an hloh a, match thum khelh tawhah an la chak vek - Ningani chawhnu dar 2:00-ah Bangladesh nen an inhmachhawn leh ang.

Zirtawpni khan New Zealand chuan Bangladesh chu wicket riatin an hneh bawk a, match thum an khelh tawha vawi khat chiah la chak Bangladesh tan semifinal lut turin thilmak beisei tel a ngai tawh.