Master Championship-ah Muanawma a langsar

Mizoram Badminton Association (MBA) in kum 35 chin chunglamte tana kum tin a buatsaih ṭhin, MBA Masters Badminton Championship 2023 chu Inrinni zan khan zawh a ni ta a, category pahniha champion thei Lalmuanawma, Hlimen, Mizoram Police Badminton Club leh Zarzokima, Hlimen, Chanmari Shuttler Club te chu hming langsar an ni.

October 11 aṭanga neih inelnaah hian, Muanawma chuan category pathum laiah final a lut a, 35+ Men's doubles ah champion zo lo mah se 40+ Men's singles leh 40+ Men's doubles-ah erawh champion nomawi a chawi ve ve - Mizoram number 1 ni rei ber record lo siam tawh Muanawma hian 40+ Men's doubles-ah hian Albert Lalnunhlima, Ralte Villa BC nen nomawi an chawi.

Serchhip Indoor Stadium-ah inelna hi neih niin, Zarzokima chuan 35+ Men's singles-ah nomawi a chawi a, 35+ Men's doubles-ah Joseph M. Lalrinawma (CSC) nen ṭangdunin nomawi an hawn bawk.