Euro 2024 khel tur Belgium

Belgium chuan nakkum Euro 2024 chu in aṭanga a lo thlirtu nih mai an tum bik lo - Zirtawpni zan khan an mikhualna ramah Austria chu 3-2 in an hneh a, match hnih khelh tur la nei chungin Euro 2024 khel turin an inpetkai.

Austria leh Belgium hi an intawn hmain point 13 ve ve an nei a, an pahnih inkhela chak zawk chu Euro 2024 khel tura tling tur an ni - hei vang hian boruak pawh a sang hle.

Belgium tan Sevilla winger Dodi Lukebakio chuan goal hnih khungin, Romelu Lukaku chuan goal khat a khung ve bawk a, 3-0 a ni hman. Mahse, Vienna khawpuia inkhelah Austria an beidawng duh lo.

Konrad Laimer leh Marcel Sabitzer (penalty) hmangin si phurh an rawn sut ṭhen ve leh a, 3-2 a nih laiin Belgium midfielder Amadou Onana chu minute 78-naah hnawhchhuah a ni bawk.

Mahse, a tawp thlengin Belgium an ṭang tlang thei a, Euro khel turin an inpetkai - Belgium hian zanin dar 12:15-ah Sweden an hmachhawn zui dawn a, an inhahdamtir thei ang.

Austria hian zanin dar 9:30-ah Azerbaijan an lenchilh dawn a, hnehna an chan chuan group F aṭanga Belgium hnung zuiin Euro 2024 an inpetkai ve leh dawn bawk a ni.