Ronaldo Lal Ropuia A ropui leh ta

Kum 38 mi ni tawh mah se Cristiano Ronaldo a la chuai ve lo a, chawlh zai a rel lo - Zirtawpni zan khan Euro 2024 qualifier-ah goal hnih a khung a, an ram Portugal chu nakkuma European football-a ram inelna sang ber khel turin a inpetkaipui leh ta.

Porto khawpuia inkhelah Goncalo Ramos chuan minute 18-naah goal hmahruai a khung a, minute 29-naah Ronaldo chuan penalty hmangin a belhchhah. Goal dang lut loin chawlhlawk hman zui a ni a, Portugal fan-te thawm a ṭha hle.

Mahse, group J inkhelah hian Slovakia beiseina chhi nung turin David Hancko chuan minute 69-naah si phurh a rawn sut ṭhen. Mahse, Portugal-in Slovakia neih loh an nei a, a hming chu Ronaldo a ni.

Al Nassr forward hian minute 72-naah goal a khung leh a, Slovakia tana Stanislav Lobotka goal khungin awmzia a nei phak tawh lo. Portugal hian match sarih an khelhah hnehna chang vekin, match thum khelh tur la nei mah se Euro 2024 khel turin an tling chiang tawh - zanin dar 12:15-ah Bosnia-Herzegovina an lenchilh zui ang.

Ronaldo hian ram tan match 202 khel tawhin, goal 125 a khung ta chiah a, a record hi a ropui rem rem hle - World Cup 2026 pawh khelh la tum nia sawi Ronaldo leh a ṭhiante major tournament-ah kan hmu leh dawn e!