Lianzuala goal an pawm lo!

Mizo tlangval Lallianzuala Chhangte chuan Zirtawpni zan khan India tan goal khung mah se a goal khung hi dik lo taka pawmsak loh a ni a, Merdeka Cup-ah India chuan sawisel theih takin Malaysia chu 4-2 in an ngam lo.

Malaysia tan hian Club Brugge defender hlui Dion Cools chuan goal hmahruai a khung a, India hian Mahesh Singh hmangin an sut ve zui. Mahse, Malaysia 'puja' a fuh laklawh a, Arif Aiman (penalty) leh Faisal Halim hmangin an khung leh a, 3-1 a ni.

Blue Tigers an beidawng duh bik lo - minute 51-naah Lianzuala siamsak duhthusam chu Sunil Chhetri chuan ram tana a goal 93-na ni turin a khung a, 3-2 a ni. Lunglei tlangval Lza hian si phurh sut zawhna goal khung zui mah se, match official-ten an pawm tlat lo!

Mumbai City forward Lianzuala khung hi en chian pawhin goal line a pel ngei a, mahse, referee-in ngaihdan dang a nei tlat! Lianzuala chuan, "Ka goal khung kha pawm se, kan in draw chiah ang a, kan chak zui thei hial ang.

"Bul kan tan ṭha a, mahse referee tihsual ngah lutuk khan min tihnual ni berin ka hria. An khelmual a chhiat avangin inkhelh a harsa bawk - chutihrual chuan insiamṭhatna tur chu kan nei reng a, kan chance neihte thlir chuan chak thei tur chu kan ni," tiin Vanglaini a hrilh.

Lianzuala goal khung an pawm loh hnuah Malaysia hian La'Vere Corbin-Ong hmangin an khung leh a, 4-2 in an chak - India tan Sahal Abdul Samad leh Suresh Singh ten an chance neih an chhawr lo bawk.

India squad-ah hian Lianzuala bakah Lalchungnunga a tel a, Durtlang tlangval Chungnunga hian ram tana a match hmasa ber khel tur erawh chuan a nghah hret a la ngai - inelna aṭang hian ram buai vangin Palestine an inhnukdawk a, match hnih tal khel tura inngai India pawh nimin khan an lo haw nghal.