Kylian Mbappe-a 'show' kan thlir

Tun hnaia Paris St-Germain tana goal khung a harsat avanga sawisel tawk Kylian Mbappe chuan a thiam a la theihnghilh lo a, Zirtawpni zan khan Netherlands lakah goal hnih khungin an ram chu hnehna a chanpui - Euro 2024 khel turin an tling bawk.

France tan Mbappe hian minute sarihnaah goal a khung ṭan a, minute 53-naah a belhchhah leh bawk - PSG forward hian hma takah Dutch team beiseina a tihtawpsak tiin a sawi theih a, an mikhualna ramah a tlangnel hle.

Netherlands tan Quilindschy Hartman chuan hun tawp hnaih lamah si phurh sut ṭhen ve mah se awmzia a nei phak tawh lo a, France-in match hnih khelh tur la nei chungin Euro 2024 an inpetkai der.

Netherlands erawh Euro khel lo thei dinhmunah an ding mek. Group B inkhel dangah Greece chuan Giorgos Giakoumakis leh Giorgos Masouras goal hmangin Republic of Ireland chu 2-0 in an hneh a, table-ah pahnihnaah an chho - Netherlands hi pathumnaah an tla thung.

Chutihrual chuan Greece hian Netherlands aiin match khatin an khel tam thung a, group B hi hmun ruak dang pakhat inchuhna boruak hi a la ngaihnawm dawn chauh niin a lang.