Chelsea-in Palace an sawp

Stamford Bridge-ah Chelsea-in Crystal Palace 4-0 in an sawp a, Ben Chilwell-a'n club thar tana Premier League-a bul ṭan hmasak berah goal hmahruai a khung. English wing back Chilwell hian Kurt Zouma tauh luh tur a siamsak zui a, Jorginho-a'n penalty aṭangin goal hnih a khung belh bawk.

Blues-in League Cup-a Tottenham Hotspur an hneh loh bakah Premier League-a an match hnuhnung berah West Brom nen 3-3 a an inhnehtawk avangin Frank Lampard-a hoten pressure an ngah a, amaherawhchu Inrinni zan inkhelah erawh an buai phah lo - Eagles lakah an thiamzia an pholang.

English manager Lampard-a'n keeper Edouard Mendy bul a ṭantir a, Thiago Silva te nen goal venghimtu an ni. Chelsea hian tun nipui transfer-ah pound maktaduai 220 an hmang tling a, Palace manager Roy Hodgson-a'n a khingpuite ṭhat zia a hria a, goal venhim chu hna pui berah a nei.

Palace-in first half-ah Blues chelh thei mah se second half erawh team ṭha danglamna a lang a, pound maktaduai 45 man Ben Chilwell chu player langsar a ni. Lampard chuan, "Beiseina a san avangin kan chungchang sawi zui a tam ṭhin hle. Season liam ta khan palina kan ni a, fak ka hlawh hle. Tun season-ah kan ṭha nghal thut thei lo a, kan dawhtheih a ngai," tiin mipuite hnenah ngenna a siam.

Chelsea-in an chung-nunzia an pholang a, Palace laka an khelh danah lawmna tur hlir a nih rualin German forward Timo Werner erawhin beisei a la pha lo. English striker Tammy Abraham-a'n penalty a chuh a, captain Cesar Azpilicueta inrawlh a ṭul hial.

Blues manager Lampard chuan, "Tammy chet dan kha pawi ka ti lo a, khelmualah captain Azpilicueta-a'n a tihtur a ti tawh a, dressing room-ah ka tih tur ka ti thung. 

"Buaina kan chingfel a, a thleng nawn tawh lo ang," tiin a sawi. International break a awm avangin Chelsea tan training-na hun ṭha zawk a awm dawn a, September 17-ah Southampton an mikhual leh ang.