England fan-ten Hendo an au el

Gareth Southgate chuan England fans ṭhenkhatin captain Jordan Henderson an au el chu a hriatthiam loh thu a sawi a, "Awmze nei lo mai a ni," a ti.

Three Lions hian Zirtawpni zan khan friendly match-ah 1-0 in Australia an hneh a, Ollie Watkins chuan inkhela goal awmchhun a khung - bench-ah Harry Kane dah a nih avangin Henderson chuan captain armband a hreng.

Mahse, Liverpool midfielder hlui hi minute 62-naa lakchhuah a nihin fans ṭhenkhatin an au el a, hei hi amah duhsak êm êmtu England coach Southgate chuan a hriatthiam loh thu a sawi chhuak a ni.

Southgate chuan, "Kan squad-ah chuan kan entawn leh zah ber a ni a, fans ṭhenkhat chet dan kha ka hrethiam lo. Hendo an auh el chhan hi ka hria a, mahse, England tana a thinlung leh theihna zawng zawng hlantu hetianga auh el a ni hi ka hrethiam lo.

"Hendo an tihelna hian engtin nge team tan ṭangkaina a neih ang? Ram tan vawi 79 a inlan tawh a, a sulhnu hi a ropui a ni. Jude Bellingham pawh inthlahrung taka squad a rawn zawm tirha lo fuih phur a, lo kaihruaitu a ni a, ram tana la inlan tam lo, experience ngah lo tak takte kha ṭha takin a kaihruai a ni," a ti.

Australia nena an friendly match-ah Southgate-a'n ram tana la inlan tam lo player a hmang nasa. Crystal Palace keeper Sam Johnstone chuan England tana a match lina khelin bul a ṭan a, AC Milan defender Fikayo Tomori (4), Brighton & Hove Albion defender Lewis Dunk (3), Chelsea midfidelder Conor Gallagher (10), West Ham forward Jarrod Bowen (5), Tottenham Hotspur attacking midfielder James Maddison (5) leh Aston Villa striker Ollie Watkins (8) te pawh ram tan an la inlan tam tawk lo.

Brighton centre back Levi Colwill phei chu England tana a inlan hmasak ber a ni a, heng ho hi Hendo, Jack Grealish leh Trent Alexander-Arnold ten hoin bul an ṭanpui a, Australia lakah an chak ta tho a ni.

Hendo hi Liverpool tana a khelh laiin neih inang inkawpte thlawptu zingah telin, a thlawpna nasa takin a lantir ṭhin a, mahse, tun nipuiah neih inang inkawp khapna ram Saudi Arabia panin Al Ettifaq a zawm a, hei hi neih inang inkawp thlawptu tam takin an sawisel.

Infiamna khawvela sum tam tak theh chhuaktu Saudi Arabia hian World Cup 2034 thlen an tum dawn a, Hendo hian social media lamah Saudi thlawpna video a lo tarlang tawh bawk.